Президенти Шавкат Мирзиёев жамоатчилик вакиллари ҳамроҳлигида Тошкент атрофида айланиб ўтмоқда. Янги транспорт инфратузилмаси объектлари, йўллар ва корхоналарнинг фойдаланишга топширилиши кутилмоқда, дея хабар берди давлат раҳбари матбуот хизмати.
Биринчи манзил Тошкент метрополитенининг Юнусобод йўналиши бўлди. Давлат раҳбари «Бодомзор» бекатидан янги «Туркистон» бекатигача поездда бориб, амалга оширилган ишларни кўздан кечирди.
«Бу йўл ҳамма нарсани тезлаштиради. Ҳаракатни ҳам, иқтисодиётни ҳам, ҳаётни ҳам», — деди Шавкат Мирзиёев.
Президентнинг 2016 йил 7 ноябрдаги фармонига биноан метро линиясини кенгайтириш ишлари бошланди. Шавкат Мирзиёев бу ерга бир неча бор келиб, ишларнинг бориши билан танишди.
Лойиҳанинг умумий қиймати 103,8 млн доллар бўлиб, қарийб 3 километр метро йўли ҳамда «Юнусобод» ва «Туркистон» бекатлари барпо этилган.
«Бу йўлни қуриш осон бўлгани йўқ, — деди президент. — Маблағ топиб, чет элдан мутахассислар олиб келиб, лойиҳани синчиклаб кўриб чиқдик. Икки йил давомида қурилиш бўлди. Энг муҳими, бу транспорт арзон, хавфсиз, қулай.»
Мутахассислар қурилиш жараёни ва сифати ҳақида маълумот берди. Йўлнинг 850 метр қисми ерости сув кўп жойга тўғри келган. Шунинг учун илгари буни амалга ошириш имкони бўлмаган. Янги лойиҳада Германия технологияси қўлланилиб, сувли жойдан темир-бетон тюбинг қўйиш орқали ўтилган.
Шуни ҳам таъкидлаш керакки, метрополитеннинг Юнусобод йўналиши тўлиқ бўлмагани учун рентабеллиги юқори эмас эди. Бугунги кунда унинг хизматидан Юнусобод туманида яшовчи 340 мингдан зиёд аҳоли фойдаланиши мумкин.
Иккита янги бекат орқали кунига 7500 йўловчига хизмат кўрсатилади. Натижада автобуслар йўналиши оптималлашиб, автомобиллар тирбандлиги камаяди. Йилига 5300 тонна зарарли газ атмосферага чиқишининг олди олинади.
Умумий ҳолда, Тошкент метрополитенидан кунига 240 минг йўловчи фойдаланади. Жами 21 километрдан иборат учта янги — Юнусобод, Сергели ва Қўйлиқ йўналишлари қурилиши натижасида яна 150 мингдан зиёд киши қамраб олиниши режалаштирилган.
Эслатиб ўтамиз, Юнусобод йўлининг қурилиши 1988 йил сентябрь ойида бошланган, аммо охиригача қуриб битказилмаган. Тўрт бекатдан иборат, лекин Юнусободнинг аҳоли зич жойлашган жойлари билан боғланмаган йўналиш 2001 йилда очилган ва қурилиши тугалланмаган иккита станция режалаштирилганидек Тошкент метрополитени схемасида намойиш этиб келинган.
Фото
