Ўзбекистон президенти Шавкат Мирзиёев фармони билан содир этган жинояти учун жазони ижро этиш муассасаларида жазо ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 113 нафар фуқаро афв этилди. Бу ҳақда ЎзА хабар берди.
Ушбу шахслар Ўзбекистон мустақиллигининг 29 йиллиги арафасида афв этилиб, озодликка чиқмоқдалар.
Фармонга кўра, афв этилган шахсларнинг 5 нафари асосий жазодан озод этилди, 53 нафари жазони ўташдан муддатидан илгари шартли озод қилинди, 15 нафарининг озодликдан маҳрум этиш жазоси енгилроқ жазо билан алмаштирилди. Шунингдек, 40 нафар шахсларга тайинланган озодликдан маҳрум этиш жазосининг муддатлари қисқартирилди.
Қайд этилишича, афв этилганларнинг 1 нафарини 60 ёшдан ошган эркак, 2 нафарини чет давлат фуқаролари, 105 нафарини тақиқланган ташкилотлар иштирокчилари ташкил этади.
Эслатиб ўтамиз, 2020 йилнинг ўзида Рамазон ҳайити муносабати 258 фуқаро, Халқаро хотин-қизлар байрами муносабати билан 83 нафар аёл ҳамда қилмишига чин кўнгилдан пушаймон бўлган ва тузалиш йўлига қатъий ўтган жазо муддатини ўтаётган 58 нафар фуқаро афв этилди.
2019 йили Ўзбекистон мустақиллигининг 28 йиллиги арафасида эса 65 нафар фуқаро афв этилган эди.
