COVID-19 инфекцияси билан қайта касалланиш эҳтимоли бор, лекин жуда паст эканини 24 август куни Жаҳон соғлиқни сақлаш ташкилоти (ЖССТ) вакили Маргарет Харрис брифинг давомида маълум қилди. У буни Гонконгда қайд этилган коронавирусни қайта юқтириш ҳолати бўйича изоҳ сифатида айтиб ўтди.
БМТ матбуот хизматининг хабарига кўра, Харрис вазиятни чигаллаштирмасликка чақирди ва бундай ҳолатлар жуда кам эканлигини айтди: 23 миллион одамдан биттасида.
«Биз янги қайд этилган қайта касалланиш ҳолатлари ҳақида кўпроқ эшитишимиз мумкин, — деди у. — Аммо, бу умумий тенденция эмас, акс ҳолда бундай хабарлар кўпроқ бўларди».
Шу билан бирга, унинг таъкидлашича, Гонконгда қайд этилган ҳолатда иккинчи маротаба COVID-19 ни келтириб чиқарган штамм биринчи мартасидан фарқ қилган. Шу ўринда, Маргарет Харрис Гонконг олимларининг тадқиқоти коронавирус иммунитети тўғрисидаги билимларни ўзгартириши мумкинлигини таъкидлади.
«Ҳозирда кўплаб тадқиқот гуруҳлари касалликдан кейин пайдо бўладиган табиий иммунитет қанча давом этишини билиш учун касал бўлган одамларда антитаналарни тадқиқ қилишмоқда. Шуни ҳам тушуниш керакки, бундай иммунитет вакцина берадиган ҳимоядан фарқ қилади», — деди у.
Эслатиб ўтамиз, аввалроқ Гонконг университети (HKU) тадқиқотчилари коронавирусга қайта чалиниш ҳолати аниқлангани ҳақида маълум қилишганди. Мутахассисларнинг қайд этишича, 33 ёшли IT соҳаси ходими апрель ойида COVID-19 касаллигини бошдан ўтказган. Аммо у август ойининг бошида Испаниядан қайтиб келгач, у топширган тест яна ижобий чиққан.
Шу каби COVID-19 инфекциясига қайта чалиниш ҳолатлари Белгия ва Нидерландия ҳам қайд этилган.
