Гонконг университети (HKU) тадқиқотчилари коронавирусга қайта чалиниш ҳолати аниқлангани ҳақида маълум қилишди, дея хабар берди РИА Новости RTHK телерадиокомпанияси маълумотларига асосланиб.
Мутахассисларнинг қайд этишича, 33 ёшли IT соҳаси ходими апрель ойида COVID-19 касаллигини бошдан ўтказган. Аммо у август ойининг бошида Испаниядан қайтиб келгач, у топширган тест яна ижобий чиққан.
Дастлаб, шифокорлар бу одам иккинчи марта инфекцияни юқтирганми ёки вирус шу вақтгача унинг танасида бўлганми ёки йўқлигини тушунишмади. Аммо, HKU мутахассислари олиб борган тадқиқотлар вирусларнинг штаммлари «бутунлай бошқача» эканлигини кўрсатди.
«Кўп одамлар COVID-19 дан даволанган беморларнинг қайта инфекцияга қарши иммунитети бор, деб ишонишади, чунки уларнинг аксариятида иммунитет бунга жавобан нейтраллаштирувчи антитаначаларни ишлаб чиқади. Аммо баъзи беморларда антитаначалар даражаси бир неча ойдан кейин пасайиши ҳақида далиллар мавжуд», — деди олимлар.
Meduza The New York Times маълумотларига таяниб хабар беришича, бемор илк бор касалланганида, унда енгил асоратлар бўлган, аммо энди улар йўқ.
Вируснинг геном кетма-кетлиги (ДНК ёки РНК кетма-кетлигини аниқлаш) шуни кўрсатдики, коронавируснинг иккинчи штамми биринчисидан сезиларли даражада фарқ қилади ва Европада июль-август ойларида кузатилган турига тўғри келади.
Илгари АҚШ ва бошқа мамлакатлар шифокорлари қайтадан коронавирус юқтирган деб тахмин қилинаётган беморлар ҳақида бир неча бор хабар беришган, аммо бу Гонконг университети олимлари томонидан ўтказилган жиддий тадқиқотларгача тасдиқланмаган эди.
