Тошкент вилоятида 4Р12 «Бектемир-Чорбоғ» автомобиль йўлида ўтказилган «Мототцикл» рейд тадбири давомида 20 дан ортиқ мототцикллар тўхталиб, ўнга яқин маъмурий баённомалар расмийлаштирилди. Бешта мототцикл жарима майдонига қўйилган бўлса, учта давлат рақам белгиларини яшириш ҳолати аниқланди, дея хабар қилди Ўзбекистон ИИВ ЙҲХББ матбуот хизмати.

Қайд этилишича, махсус автоматлаштирилган фото қайд этиш техника воситалари ёрдамида ушбу автойўлда жорий йилнинг ёз ойи бошидан буён 65 та мотоциклчи томонидан тезликни меъёридан ошириш ҳолати аниқланган. Барча ҳолатларда аҳоли яшаш жойида яъни 70 км/соат тезлик белгиланган жойда 110 км/соат тезликдан ортиқ, 140 дан 166км/соат тезликкача ҳаракатланган.


Мисол учун, жорий йилнинг 6 август куни Юқоричирчиқ туманидан ўтувчи «Бектемир-Чорбоғ» автомобиль йўлининг 16 километрида Honda русумли мотоцикл 70 км/соат тезлик белгиланган жойда 166 км/соат тезлик билан ҳаракатланган бўлса, 10 июль куни ушбу автомобиль йўлининг 34 километрида Suzuki русумли мотоциклда 146 км/соат тезлик билан ҳаракатланган.

Ушбу мотоцикл ҳайдовчиларига нисбатан Ўзбекистон Маъмурий жавобгарлик кодексининг 128-моддаси 3 қисмига биноан базавий ҳисоблаш миқдорининг 9 баробарида жарималар белгиланиб, жарима қарорлари яшаш манзилларига жўнатилган.