22 августдан бошлаб абитуриентлар Давлат тест маркази сайтидаги ўз шахсий кабинетидан абитуриент рухсатномасини юклаб олишлари мумкин бўлади. Шу билан бирга, ҳужжат тўлдириш жараёнида киритилган телефон рақамига бу ҳақда SMS-хабар юборилади, дея маълум қилди ДТМ директори ўринбосари Сардор Ражабов АОКА залида ўтказилган матбуот анжуманида.
Сардор Ражабов рухсатномалар ва имтиҳон ўтказилиши юзасидан берилган саволларга ҳам жавоб берди.
— Абитуриентлар рухсатномаларни қандай олишлари мумкин?
Бу ҳақда абитуриент рўйхатдан ўтганда сайтга киритган телефон рақамига «Сизнинг абитуриент рухсатномангиз шакллантирилди, шахсий кабинетингизга кириб, рухсатномани юклаб олинг» мазмунидаги хабар юборилади. Ҳар бир абитуриентнинг шахсий кабинетида абитуриент рухсатномаси қўйилади.
- Тест имтиҳони ўтказиладиган жойга қанча вақт олдин бориш керак?
Абитуриентлар тест синовлари ўтказиладиган секторларга камида ярим соат олдин келиб ўз ўрнини эгаллаши керак. Эрталабки сменада 6:30дан бошлаб абитуриентларни бинога киритиш бошланади, Иккинчи сменада 16:30дан бошлаб секторларга киритиш ишлари бошланади.
— Агар тест ўтказиладиган кун об-ҳаво туфайли, қаттиқ шамол ва ёғингарчилик кузатилса қандай йўл тутилади?
Агар тест ўтказиладиган кун об-ҳаво туфайли, қаттиқ шамол ва ёғингарчилик кузатилса, шу кунги тест бошқа кунга, яъни барча имтиҳонлар тугагандан кейинги кунларга кўчирилади.
— Ногиронлиги бўлган абитуриентларга тест ечишда алоҳида имтиёз борми?
Барча абитуриентлар учун вақт бир хил вақт берилади. Уларга тест ечишда қўшимча вақт берилмайди.
— Тестга ҳайдовчилик гувоҳномаси ёки паспорт нусхаси билан ҳам кирса бўладими?
Вазирлар Маҳкамасининг тегишли қарорларида абитуриент тест синовларига фуқаролик паспортини олиб келиши шарт экани кўрсатилган, нусхаси эмас. Абитуриентнинг қўлида иккита ҳужжат бўлиши лозим — паспорт ва ДТМ рухсатномаси. Ушбу ҳужжатлар бўлмаган тақдирда абитуриент тест синовларига киритилмайди.
