Мали пойтахти Бамако чеккасидаги ҳарбий бўлинмалар 18 август куни исён кўтариб, пойтахт томон йўл олишди. Кейинроқ улар президент Иброҳим Бубакар Кейта ва бош вазир Бубу Сиссе ҳибсга олингани ҳақида хабар беришди, дея маълум қилди «ТАСС».
Қўзғолоннинг сабаблари тўлиқ маълум эмас. Аммо гап тўловлар миқдорининг паст эканлигидан норози бўлган ҳарбий бўлинмалар ҳақида кетмоқда. Мали Мудофаа вазирлиги вакили «мамлакатда чалкашликлар ҳукм сураётганлигини» айтган.
РИА Новости хабарига кўра, ҳибсга олинганидан бир неча соат ўтгач, Иброҳим Бубакар Кейт ўз истеъфосини ва парламент тарқатиб юборилишини эълон қилди. «Мен бундан буён ваколатларимни тарк этишга қарор қилдим… Мен ўз кучимни сақлаб қолиш учун қон тўкилишини истамайман», — деди президент. Унинг нутқи давлат телевидениесида намойиш этилди.
Қўзғолончилар халқни қутқариш учун миллий қўмита ташкил этилганлигини эълон қилишди. Ҳозирги сиёсий инқироз сўнгги ойларда мамлакатда кучайиб кетган ҳукуматга қарши мухолифат томонидан бир неча бор кучайтирилди.
ТАСС таъкидлаганидек, Саудия Арабистонида таҳсил олган таниқли дин арбоби Имом Маҳмуд Дико сиёсий устунликка ўтди. У мухолифатдаги «5 июнь ҳаракатини — Ватанпарвар кучлар иттифоқи»ни яратди. Унинг иштирокчилари президентнинг зудлик билан истеъфога чиқишини ва режимни ўзгартиришни талаб қилишди. Энг йирик ҳукуматга қарши намойишлар 5, 19 июнь ва 10 июль кунлари пойтахтда бўлиб ўтди.
БМТ Бош котиби Антонио Гутерриш Малидаги исёнларни қоралаб, конституцион тузум ва қонун устуворлигини тезда тиклашга, шунингдек, мамлакат раҳбарларини озод қилинишига чақирди.
Ғарбий Африка давлатларининг иқтисодий ҳамжамияти (ЭКОВАС) Малидаги ҳарбийлардан зудлик билан казармаларга қайтишни талаб қилди. Улар мамлакатни янада беқарорлаштириши исломий террорчилик тузилмаларининг фаоллашувига ёрдам бериши мумкинлигидан хавотирда. Ҳамжамият, шунингдек, барча чегаралар ёпилгани ва Мали билан барча иқтисодий битимларнинг якунланиши ҳақида эълон қилди.
Сўнгги йилларда Малида террорчи ташкилотлар фаоллашди, деб ёзади ТАСС. Уларнинг энг каттаси Ғарбий Африкадаги Исломий Давлат (ISWAP) ва Буюк Саҳродаги Исломий Давлат (ISGS). Иккаласи ҳам «Исломий давлат» тузилмаларидир. «Ал-Қоида» билан боғлиқ гуруҳлар Буркина-Фасо билан чегарадош ҳудудларда ҳам ишлайди. Террористлар қитъанинг ғарбий қисмида Африка халифатини барпо этишни режалаштиришмоқда.
