Ўзбекистонга хорижий давлатлардан кириб келаётган шахсларни карантин марказларида сақлаш муддатини 7 кунгача қисқартириш имконияти пайдо бўлди. Бу ҳақдаги тегишли Республика махсус комиссиясининг қарори 12 август куни эълон қилинди.
Унга кўра, Жаҳон соғлиқни сақлаш ташкилотининг тавсияларини инобатга олиб, шунингдек, мамлакатдаги эпидемиологик вазиятдан келиб чиққан ҳолда Ўзбекистонга хорижий давлатлардан кириб келаётган шахсларни карантинга олишнинг қуйидагиларни назарда тутувчи тартиб жорий этилди:
- хорижий давлатлардан кириб келаётган шахсларни карантинда сақлаш муддати 14 кун этиб белгиланади;
- карантин муддатини шахснинг хоҳишига кўра карантин марказларида ёки меҳмонхоналарда ўтказиш тартиби сақлаб қолинади.
Шу билан бирга, карантин муддати шахснинг даволаш профилактика чора-тадбирларини амалга оширишга розилигига кўра, карантинда сақлаш муддати врачлар кузатуви остида даволаш-профилактика чора-тадбирларини амалга оширган (Соғлиқни сақлаш вазирлиги томонидан тавсия этилган дори воситаларини қабул қилган) ҳолда 7 кун этиб белгиланади (бунда 7 кунлик карантиндан сўнг тест натижаси манфий бўлганда шахс карантин марказидан чиқарилади).
«Қизил», «сариқ» ва «яшил» рейслар
Республика махсус комиссиясининг қарори билан Ўзбекистон Республикасига хорижий давлатлардан фуқароларни кириши бўйича тоифага ажратилган давлатлар рўйхати тасдиқланди ҳамда ушбу рўйхат ҳар ҳафтада янгилаб борилиши белгиланди.
Санитария-эпидемиологик вазият барқарор бўлган «яшил рейслар» рўйхатига кирувчи Хитой, Тайланд, Малайзия, Жанубий Корея, Грузия, Венгрия, Латвия, Япониядан Ўзбекистонга кириб келган шахслар охирги 10 кун ушбу мамлакатларда бўлиб турган бўлса, улар карантин назоратига олинмайди.
Коронавирус инфекцияси билан касалланиш ҳолатлари камайган «сариқ» рейслар этиб ҳисобланган Европа Иттифоқи давлатлари (Буюк Британия ва Испания бундан мустасно), Озарбайжондан Ўзбекистонга кириб келган шахслар охирги 10 кун ушбу мамлакатларда бўлиб турган бўлса, улар 14 кун давомида уй карантини назоратига олиниши белгиланган.
Коронавирус инфекцияси билан касалланиш ҳолатлари камаймаган «қизил рейслар»дан (юқоридагилардан бошқа барча давлатлар) Ўзбекистонга кириб келган шахслар 14 кун давомида карантин назоратида сақланади.
