Европа Иттифоқи Беларусь билан муносабатларини қайтадан кўриб чиқиши кераклигини ва норозилик намойишлари қатнашчиларига нисбатан зўравонликларга алоқадор бўлган раҳбарларга нисбатан санкциялар қўллаши мумкин. Бу ҳақда Европа дипломатияси раҳбари Жозеп Боррель расмий баёнотида таъкидланади, дея хабар берди Ведомости нашри.
Боррелнинг таъкидлашича, Европа Иттифоқи Беларусдаги президентлик сайловларини «эркин эмас ва адолатсиз» деб ҳисоблайди. Шунингдек, у Беларусь ҳукумати олдига норозилик намойишлари пайтида ҳибсга олинганларнинг барчасини озод қилишни талабини қўйди.
«Биз Беларусь ҳукуматини барча ҳибсга олинганларни зудлик билан ва эътирозларсиз озод қилишга чақирамиз», — дея қўшимча қилди у.
Кейинроқ АҚШ давлат котиби Майкл Помпео Белорусдаги сиёсий вазият сабабли мамлакатга қарши санкциялар қўлланилиши, шунингдек, нефт етказиб беришни тўхтатиб қўйиши мумкинлигини айтди.
Майкл Помпео ҳам бўлиб ўтган сайловларни адолатсиз деб атади.
Эслатиб ўтамиз, 9 август куни Беларусда президентлик сайловлари бўлиб ўтди. 10 август куни сайлов натижалари эълон қилиниб, унда Александр Лукашенко 80,08% овоз тўплагани маълум қилингач, сайлов натижаларидан норози бўлганлар Минск ва бошқа шаҳар кўчаларига чиқишган.
Шунингдек, Александр Лукашенконинг асосий рақиби Светлана Тихановская (10,09%) мамлакатдан чиқиб кетишга ва Литвага кўчиб ўтишга мажбур бўлган.
Беларусда биринчи куни (10 август) 3000 нафар, иккинчи куни (11 август) эса 2000 нафар норозилик қатнашчилари ушланган. Намойишчилардан ташқари, Беларусь хавфсизлик кучлари норозилик намойишларини ёритиб бораётган бир неча рус журналистларини ҳам ҳибсга олишган.
Сўнгги, маълумотларга кўра, 12 августга келиб намойишлар бироз тинчроқ тус олган. Кун ярмида бутун мамлакат бўйлаб зўравонликка қарши бирдамлик митинглари бўлиб ўтди, уларда оппоқ кийимлар ва қўлларида гуллар бўлган аёллар иштирок этди. Минскдаги намойишларга 200 дан ортиқ шифокорлар қўшилди, дея хабар берди TUT.by портали.
Беларусь ички ишлар вазирлигининг маълумотларига кўра, ушбу кун давомида яна 700 киши ҳибсга олинган, дея хабар берди РИА Новости. Таъкидланишича, 9 дан 13 августгача жами 100 дан ортиқ хавфсизлик хизмати ходимлари жароҳат олган.
Европа Иттифоқи мамлакатлари ТИВ раҳбарлари 14 август куни Белорусдаги вазиятни муҳокама қилишади. Белорусь Ташқи ишлар вазирлиги бу борада ғарблик шерикларига мамлакатда бўлиб ўтаётган воқеалар фонида аниқ далилларни тақдим этишга тайёрлигини билдирди.
