TikTok 15 ой давомида миллионлаб Android операцион тизимида ишлайдиган смартфонлар фойдаланувчиларининг маълумотларини йиғиб келган, дея хабар берди The Wall Street Journal.
Хабарда айтилишича, TikTok Google ишлаб чиққан Android тизимининг махфийлик ҳимоясини четлаб ўтишга эришган ва «миллионлаб» смартфонларнинг уникал идентификаторларини қўлга киритган. Яъни гап, MAC-манзиллар — иловага интернет-фойдаланувчиларини кузатишга имкон берувчи идентификаторлар ҳақида кетмоқда.
Илова камида 15 ой давомида, 2019 йилнинг ноябрь ойигача фойдаланувчиларнинг маълумотларини йиғиб келган.
The Wall Street Journal нашрининг таъкидлашича, TikTok кузатувни алоҳида қўшимча шифрлаш қатлами орқали яшириб келган ва Google нинг фойдаланувчиларни кузатишни тақиқловчи қоидаларини бузган.
Маълумотларга кўра, умумий ҳисобда Android иловаларининг 1 фоизи MAC-манзилларини тўплайди. Бу кўрсаткич мобил иловаларини таҳлил қилувчи AppCensus хизмати томонидан ўтказилган 2018 йилги тадқиқотда маълум бўлган.
Федерал савдо комиссиясининг таъкидлашича, MAC-манзиллари Болаларнинг онлайн махфийлигини ҳимоя қилиш тўғрисидаги қонунга мувофиқ шахсий маълумот ҳисобланади.
Эслатиб ўтамиз, аввалроқ АҚШ TikTok ни тақиқлашни режалаштираётганини, ва компания тақиқловдан қутилиш учун уни АҚШ компаниясига сотишга қарор қилганлиги ҳақда хабар берган эдик. Ҳозирда Microsoft корпорацияси TikTok нинг АҚШдаги қисмини сотиб олиш бўйича музокаралар олиб бормоқда. Сўнгги маълумотларга кўра, Twitter ҳам компания билан музокараларга киришган ва TikTok нинг америка томонини ўз компаниясига бирлаштиришни режа қилаётганлиги ҳақида маълум қилган.
