Россиянинг Қозон шаҳридан Тошкентга 4 август куни қайтиб келган 31 ёшли деновлик эркак карантинга олинган меҳмонхонада ўз жонига қасд қилди. Бу ҳақда Мирзо-Улуғбек тумани прокуратураси маълум қилди.

Қайд этилишича, 10 август куни, соат 10:33да Мирзо Улуғбек тумани ИИО ФМБ навбатчилик қисмига хабар келиб тушган. Унга кўра, Сурхондарё вилояти, Денов туманида яшовчи К.О. ўз жонига қасд қилиб, Мирзо Улуғбек тумани, БИЙ кўчаси, 115-уйда жойлашган «Саёхат» меҳмонхонасининг 4-қават 408-хонасидан ўзини улоқтириб, вафот этган.

Дастлабки терговга қадар текширув ишлари олиб бориш жараёнида, ушбу фуқаро, Россия Қазан шаҳрига ишлаш учун оиласи билан бирга кетганлиги, 4 август куни «Чартер» рейс орқали Тошкент шахрига олиб келиниб, Мирзо Улуғбек тумани ДСЭНБ томонидан карантинга олиниб, «Саёхат» меҳмонхонаси 408-хонага жойлаштирилганлиги, 7 август куни «COVID 19» вируси мавжуд ёки мавжуд эмаслигини аниқлаш учун тест топширганлиги ва 9 август куни «COVID 19» касаллиги йўқлиги тўғрисида тест натижаси аниқланган.

Шунингдек, фуқаро К.О. яқин қариндошлари билан телефон орқали сухбат қилинганида, улар сўнги пайтларда К.О.нинг руҳиятида салбий томонга ўзгаришлар сезилганлигини ва ўзини ёмон ҳис қилиб юрганлигини, шу сабабли унинг турмуш ўртоғи ва икки нафар вояга етмаган фарзандлари Россияда қолишига қарамасдан, уни Ўзбекистонга олиб келинганлигини баён қилишган.

Таъкидланишича, ҳозирда, мазкур ҳолат юзасидан Мирзо Улуғбек тумани прокуратураси томонидан терговга қадар текширув ишлари олиб борилиб, К.О.нинг рухий касаллика чалинган ёки чалинмаганлиги ҳолатларига аниқлик киритиш чоралари кўрилмоқда.