Врачлар малакасини ошириш институти доценти Дилфуза Ҳасанова грипп билан оғриётган бемор коронавирус инфекциясини ҳам юқтириб олса, унда касаллик оғир кечишини, шу боис бемор қатъий карантин чораларига риоя қилиши кераклигини қайд этиб ўтди. Бу ҳақда доцент «Ўзбекистон 24» телеканалида эфирга узатилган «COVID-19 савол-жавоб» дастурида маълум қилди.
«Грипп билан оғриётган бемор қатъий карантин чораларига риоя қилса, унга вирус юқмайди. Бемор грипп билан коронавирусни юқтириб олган бўлса, касаллик оғир кечади. Гриппда иммунитет паст бўлса, касаллик ўтиб кетадиган бўлса, грипп чақирадиган пневмонияга олиб келиши мумкин. Бунда ўпканинг юқори қисмлари зарарланади», — дея таъкидлади Дилфуза Ҳасанова.
Унинг сўзларига кўра, СOVID-19 инфекцияси кўпинча ўпканинг пастки қисмлари: нафас олишда камроқ иштирок этадиган бўлмаларини шикастлайди. Ёндош касалликлар, табиийки, касаллик кечишини оғирлаштиради.
«Грипп билан зарарланган бемор коронавирусга тест топширса, лекин ёлғон манфий жавоб чиқса (30 фоиз эҳтимол), демак, менда касаллик йўқ экан, деб атрофдагилар учун ташувчи бўлиб қолиши мумкин», — деди Врачлар малакасини ошириш институти доценти.
Шу сабабли грипп билан касалланганлар ҳам ўзини изоляция қилиши лозимлиги билдириб ўтилди. Шу билан бирга, ўзини яккалаган бемор гриппдан тўлиқ фориғ бўлгач, нормал ҳаётга қайтиши мумкинлиги қайд этилди.
