Twitter Дональд Трампнинг саҳифасида COVID-19 ҳақида ёлғон маълумотларни ўз ичига олган видео пайдо бўлганидан кейин АҚШ президентининг аккаунти орқали пост ёзиш имкониятини чеклашга қарор қилди. Постдаги видеода АҚШ президентининг болалар коронавирусга камроқ мойил бўлишини таъкидлаган интервьюси бўлган. Бу ҳақда CNN хабар берди.
Бундан бир неча соат аввал, Facebook Трампнинг саҳифасидаги худди шу маълумотларни ўз ичига олган интервьюни ижтимоий тармоқдан олиб ташлаган эди. Гап Дональд Трампнинг 5 август куни Fox News телеканалига берган интервьюси ҳақида кетмоқда. Унда АҚШ президентининг таъкидлашича, «коронавирус болалар учун хавф туғдирмайди».
Facebook ходими Энди Стоун буни «коронавирус бўйича ёлғон маълумот берилган ва бу бизнинг сиёсатимизга тўғри келмайди», дея изоҳлади. Шунингдек ходим, ижтимоий тармоқдан Доналд Трампнинг хабарларининг ўчириб ташланиши биринчи бор кузатилмаётганлигини, аммо бу илк бор COVID-19 ҳақида маълумот бериш сиёсатининг бузилиши билан боғлиқ эканлигини таъкидлади.
Шу мазмундаги видео Трампнинг Twitter даги сайловолди штаби томонидан юритиладиган @TeamTrump саҳифасига ҳам жойлаштирилган. Ижтимоий тармоқ маъмурияти уни ҳам ўчириб ташлади.
Доналд Трумп штаби вакили Кортни Парелла интернет компанияларининг АҚШ президентини ноҳақ айблаётганлигини таъкидлади. Унинг сўзларига кўра, Трамп фақат «болалар коронавирусга камроқ сезгир эканлиги» тўғрисидаги маълумотни келтирган.
