Россияда таҳсил олаётган чет эллик талабаларга ўқиш пайтида ишлаш рухсатнома ёки патентсиз ишлаш ҳуқуқи берилди. Янги буйруқ 5 август куни кучга кирди, дея хабар берди Россия Федерацияси Фан ва олий таълим вазирлиги.
«Энди иш берувчи билан меҳнат шартномаси ёки фуқаролик-ҳуқуқий шартнома тузиш учун улар Россияда ўқиётганликлари тўғрисида фақат университет (коллеж) маълумотномасини тақдим этишлари керак. Бу ҳолда иш берувчига чет эллик ишчиларини жалб қилиш ва улардан фойдаланиш учун рухсат олиш талаб этилмайди», — дейилади баёнотда.
Таълим олгандан кейин (ўқишни тугатгандан кейин) шартнома бекор қилиниши керак, дея қўшимча қилди вазирлик.
Иш берувчилар давлат аккредитациясига эга бўлган касб-ҳунар таълими дастурида коллеж ва университетларда кундузги таҳсил олаётган чет эллик талабаларни ёллашлари мумкин. Талабаларга ўқишдан бўш вақтларида, шу жумладан Россия Федерацияси субъекти ҳудудидан ташқарида, яъги улар ўқиётган ҳудуддан ташқарида ишлашга рухсат берилади.
Илгари, чет эллик талабалар меҳнат рухсатномаси ёки патентсиз фақат таътил кунлари ва уларнинг ўқув юртлари асосида ишлаш ҳуқуқига эга эдилар.
