1 август куни Берлинда коронавирус пандемияси билан боғлиқ чеклов чораларига қарши кенг кўламли норозилик акцияси бўлиб ўтди. Тўқнашувлар оқибатида 45 нафар полиция ходими жароҳатланди, 133 иштирокчи ҳибсга олинган, дея хабар берди DW.
Митинг кун ярмида бошланиб, кечгача давом этди. Намойишчилар 1 августни пандемиядан «Озодлик куни» деб тан олишни талаб қилишди. Акцияда 20 мингга яқин киши қатнашди. 1100 га яқин полиция ходими хавфсизликни таъминлаш учун намойиш ўтказилаётган ҳудудларда бўлишди. Улар намойишчиларни масофани узоқроқ сақлашга ва ниқоб кийишга ундашди, аммо улар бунга риоя қилишмади.
Акция вақтида бир неча намойишчилар полицияга ҳужум қилиб, уларга тош отишди. Огоҳлантиришлардан сўнг полиция тадбир тугаганини эълон қилди. Акцияга келганларнинг баъзилари кетишни рад этишди ва уларни йўлдан куч ишлатган ҳолда олишга тўғри келди, дейилади хабарда. Ҳибсга олинган 89 нафар шахсга нисбатан жиноий ишлар қўзғатилди.
Хабар берилишича, намойиш Штутгартдан келган Querdenken 711 ташкилоти вакиллари томонидан ташкил этилган. Ушбу ташклотга «фитна теорияси» тарафдорлари, ўнг экстремистлар ва ковид-диссидентлар аъзо ҳисобланади. Полиция маълумотларига кўра, ўта ўнг қанот ҳаракат тарафдорлари ҳам одамларни акцияда иштирок этишга даъват қилган ва намойишга Учинчи Рейхнинг бир нечта байроқлари олиб келинган.
Германияда июль ойи охиридан COVID-19 га чалиниш ҳолатлари бирданига ортишни бошлади. Мамлакатда умумий аниқланган ҳолатлар сони 209893 га етган, 9 141 киши вафот этган.
