Икки нафар COVID-19 инфекциясига чалинган бемор вафот этди, дея маълум қилди Соғлиқни сақлаш вазирлиги.
Хабарда қайд этилишича, Мирзо Улуғбек туманида яшаган 69 ёшли бемор Н.Е. (аёл) ва Олмазор туманида яшаган 49 ёшли бемор Д.С. (аёл) ўткир нафас, юрак қон-томир ва полиорган етишмовчилигидан вафот этган.
Бунда, биринчи бемор жорий йил 25 июль куни «COVID-19» инфекцияси тасдиқланган ва нафас етишмовчилиги белгилари кучайганлиги сабабли Тошкент тиббиёт академияси клиникасига ётқизилган.
«Унга „COVID-19“ инфекциясининг ўта оғир кечиши, икки томонлама пневмония ташхиси қўйилган. Хасталик ўткир респиратор дистресс синдроми, ўткир нафас ва юрак қон-томир етишмовчилиги асоратлари билан кечган. Шунингдек, бемор юрак ишемик касаллиги, гипертония каби ҳамроҳ касалликлар билан ҳам оғриган», — дейилади хабарда.
Шунингдек, иккинчи беморда ҳам жорий йил 25 июль куни «COVID-19» инфекцияси тасдиқланган ва бир неча кун давомида тана ҳарорати кўтарилганлиги, нафас етишмовчилиги кучайганлиги сабабли Вирусология илмий-текшириш институти клиникасига ётқизилган.
Унга ҳам «COVID-19» инфекциясининг ўта оғир кечиши, икки томонлама пневмония ташхиси қўйилган. Хасталик ўткир нафас етишмовчилиги, ўткир респиратор дистресс синдроми, полиорган етишмовчилиги асоратлари билан кечган. Шунингдек, бемор юрак ишемик касаллиги, гипертония ҳамроҳ касалликлар билан ҳам оғригани маълум қилинди.
Шу боис, ҳозирги вақтга келиб, COVID-19 асоратларидан вафот этганлар сони 157 нафарга етди.
