Ўзбекистон мутахассислари хитойлик ҳамкорлар билан биргаликда коронавирус инфекциясига қарши вакцина синовларининг сўнгги — учинчи учинчи босқичини ўтказишлари мумкин, дея хабар берди «Дунё».
Бу ҳақда Ўзбекистоннинг ХХРдаги элчиси Бахтиёр Саидов ва Хитойнинг Sinopharm Group бошқарувчиси Лю Цзинчжэн ўртасида бўлиб ўтган COVID-19 пандемиясига қарши курашиш имкониятлари муҳокама қилинган учрашувдан сўнг маълум бўлди.
Хитой China National Biotec Group (CNBG Sinopharm Group таркибига киради) томонидан ишлаб чиқилган, фаол бўлмаган ва рекомбинант коронавирус вакциналарини клиник синовлардан ўтказишнинг икки босқичи муваффақиятли якунланганини эълон қилди.
«Яқинда ХХРда аҳоли ўртасида ўтказилган клиник синовларнинг учинчи босқичи бошланди. Шуни ҳисобга олган ҳолда, Хитой корпорациясининг раҳбари шу каби синовларни Ўзбекистон ҳудудида ўтказишни таклиф қилди», — дея маълум қилди «Дунё».
Шу билан бирга, БААда ҳам тахминан 15 минг киши иштирокида янги вакцина синовлари ўтказилади.
Инъекциядан кейин инактивация қилинган вакцинанинг таъсир қилиш муддати икки йил дея баҳоланмоқда. Бугунги кунга қадар Хитойда 50 мингдан ортиқ одам эмланди, хабар берди «Дунё».
Июль ойида Пекинда вакцина ишлаб чиқариш бўйича иккинчи завод қурилиши якунланди, бу унинг ишлаб чиқариш қувватини йилига 200 миллион дозага етказади. Биринчи завод эса коронавирус ўчоғи ҳисобланган Уханда қурилган.
11 март куни Жаҳон соғлиқни сақлаш ташкилоти янги коронавирус инфекцияси COVID-19 пандемия эканлигини эълон қилди. ЖССТнинг сўнгги маълумотларига кўра, дунёда 14 миллиондан ортиқ касаллик ҳолатлари аниқланган, 600 мингдан ортиқ одам вафот этган.
