Олий Мажлис Қонунчилик палатаси депутати, Либерал-демократик партияси (ЎзЛиДеП) фракцияси аъзоси Расул Кушербаев UzAuto Motors компаниясини Damas тез тиббий ёрдам машиналарини қиммат нархларда сотаётганлиги сабаб танқид қилди.
Фото: Шухрат Латипов / «Газета.uz».
Парламент депутати тез ёрдам учун 75 млн сўмдан 20 Damas автомашинасини сотиб олган Фарғона вилояти ҳокимлигини мисол қилиб келтирди.
«Шу UzAuto Motors га ҳам ҳайронсан. Россиянинг Уфасида автомобиллари очиқда қолиб чириб ётса ҳам ўз халқи учун жилла қурса Damas ларидан бепул ёки имтиёзлар билан бериш қийинми?», — дейди Расул Кушербаев.
«24 йил давомида халқимиз билан биргамиз», деб кўкрагини кераётган бу монопол ҳеч бўлмаса шу оғир кунларда ҳақиқатдан халқи билан бирга эканлигини исботласа бўларди. Ахир шунча йил шу халқ ҳисобидан ялло қилиб яшади, эртага шу халқ бўлмаса уни «эрка» лигини ким кўтаради, дефектлар билан чиқаётган, отни калласидек қиммат машиналарини ким олади, албатта шу халқ олади. Пулини тўлаб ойлаб кутадиган Россия, Қозоғистон, Украина халқи эмас, шу халқ олади, шу халқ минади. Шу касал бўлаётган одамлар бўлмаса ҳеч кимсан «монопол дўстим»!" -дейди депутат.
«Ўзавтосаноат»нинг муносабати
Фото: Шухрат Латипов / «Газета.uz».
«Газета.uz» нинг мурожаатига кўра «Ўзавтосаноат» матбуот хизмати депутат Расул Кушербаевнинг кеча «ЎзАвто Моторс» тез тиббий ёрдам машиналарини юқори нархларда сотаётгани ҳақидаги «эълони» маданиятли мулоқотлар доирасидан чиқиб кетганини маълум қилди. Чунки вазиятни тўлиқ билмайдиган ўқувчи учун, бу компания ушбу ҳолатларда нархларни атайлаб ошириб юбораётганини англатади.
«Ўзавтосаноат» компанияси Расул Кушербаевнинг сўзларида популизм борлигига ишора қилди ва айбловларга бирма-бир тўхталиб ўтишди.
«Жаноб Кушербаев „UzAuto Motors“ COVID-19 пандемияси муносабати билан Ўзбекистонда юзага келган оғир вазиятни эътиборга олмаётир, дея даъво қилади. Бироқ, биз профессионал журналист ўзи айтаётган сўзларининг моҳиятини чуқурроқ англаши, тажрибали парламентарий эса, сўзларининг масъулиятини яхшироқ ҳис қилиши лозим эканлигига аминмиз. Афтидан, депутат учун бу — ўз шахсини бутун тармоққа қарши қўйиш ҳисобига аудитория қамровига осонроқ эришишга қаратилган оддий хабар бўлган. Шундай бўлса-да, ўз сайловчиларига бўлган оддий ҳурмат ҳам уларга текширилган ахборот тақдим этишни назарда тутади. Афсуски, баёнотдаги депутат сўзларида ҳаққонийликдан асар ҳам йўқ», — дейилади компания баёнотида.
Компаниянинг таъкидлашича, нафақат «UzAuto Motors», балки компания ходимлари ҳам, ҳамкорлари ҳам пандемиянинг биринчи кунларидан коронавирусга қарши курашда фаол қатнашиб келмоқда.
«Тўғри, эҳтимол, компания ўзининг хайрия акцияларини кўз-кўз қилмаётгандир, бироқ бу ҳеч бир сиёсатчига тармоқ корхоналарининг ва уларда ишлаётган ўн минглаб ходимларнинг умумий курашга қўшаётган ҳиссаларини камситиш ҳуқуқини бермайди. Хайрия ишларидаги улушлари ҳақида гапириш компания одатларига кирмайди, аммо Расул Кушербаев ўзининг ҳақоратомуз пости билан уларни ёдга олишга мажбур қилмоқда: „Ўзавтосаноат“ АЖ ва унинг тузилмавий бўлинмалари биринчилардан бўлиб „Ўзбекистон меҳр-шафқат ва саломатлик“ жамоатчилик фондига 1 миллиард сўмдан зиёд маблағ ўтказди», — дея маълумот берди компания.
Бундан ташқари, жорий йил апрель ойида компания республикага хорижий ҳамкорларидан 2 миллиард сўмлик тиббиёт жиҳозларини келтириш ташаббускори бўлди. Яна 2 миллиард сўмга тенг маблағ тармоқ корхоналари томонидан Сардоба сув омбори ёрилиши ва Бухоро вилоятидаги тўфондан зарар кўрганлар фойдасига ўтказилди, дейилади хабарда. Компания томонидан ҳокимият идораларига, карантин муассасаларининг қурилиши учун ЎСВ аппаратлари ва 2500 та контейнер беғараз тақдим этилган.
Бундан ташқари, эпидемиянинг илк кунларида, ҳали махсус карантин марказлари яратилмаган пайтда, «Ўзавтосаноат» АЖ Ҳожикентдаги «Лочин» идоравий соғломлаштириш оромгоҳини юзлаб инсонларни карантинга жойлаш учун тақдим этди ва уларнинг тўлиқ таъминотини зиммасига олди.
«Мана шулар ва бошқа кўплаб фактлардан кейин ҳам, компания ватандошлар ташвишларига беэътибор, деб даъво қилиш қанчалик тўғри бўлади?», — дея савол беради «Ўзавтосаноат».
Компания вакиллари Фарғона вилояти ҳокимлиги томонидан 20 та янги Damas автомобиллари сотиб олингани билан боғлиқ вазиятга изоҳ беришди.
«Бу билан жаноб Кушербаев айнан нима демоқчи бўлгани унчалик тушунарли эмас. Агар бу тез ёрдам эҳтиёжлари учун автомобиллар бепул берилиши кераклигига шама бўлса, унга, ҳар қалай, ўтган ҳафтанинг ўзида UzAuto Motors мутлақо бепул асосда Андижон вилояти ҳокимлигига олти дона Damas тез ёрдам автомобилини тақдим этганлигини аниқлаштириш қийинчилик туғдирмаган бўларди. Афтидан, бу ҳақда барча ОАВларда эълон қилинмагани хато бўлган кўринади, лекин компания умумий офат пайтида бундай ишларни кўз-кўз қилишни тўғри деб ҳисобламайди», — дейилади компания хабарида.
«Балки, Расул Хидралиевич тез ёрдам эҳтиёжлари учун барча автомобиллар беғараз етказиб берилишини истар? Аммо, Қонунчилик палатасининг ҳурматли депутати илгари сураётган бу ғоя муносабати билан, Ўзбекистон Республикасининг «Ҳомийлик тўғрисида"ги Қонунининг айрим меъёрларини эслатиб ўтишни хоҳлар эдик», — дейилади компания баёнотида.
«Ўзавтосаноат» вакиллари «Хайрия тўғрисидаги» қонуннинг 5 моддасига кўра, устав фондида давлат улуши 50%дан ортиқ бўлган хўжалик юритувчи жамиятларнинг ҳомийликка йиллик харажатлари ўтган йилда олинган соф фойданинг 10 фоизидан ошмаслиги кераклигини эслатишди. «Шу муносабат билан, биринчи ярим йилликнинг ўзида хайрия мақсадларига 37 миллиард сўмдан зиёд маблағ йўналтирган „UzAuto Motors“, минг хоҳламасин, ушбу чегарани босиб ўта олмайди».
«Энди савол туғилади: мамлакатимизда қонунларни ким ёзади? „UzAuto Motors“ раҳбариятими ёки, ҳар қалай, Олий Мажлис Қонунчилик палатаси депутатларими? Барчаси сизнинг қўлингизда, ҳамкасбларингиз ихтиёрида, қадрли Кушербаев жаноблари», — таъкидлайди компания.
«UzAuto Motors» ўз хайрия фаолиятида депутатлар ишлаб чиққан қонунларга таянишини, улар томонидан жорий қилинган чекловлар доирасида иш кўришини билдириб ўтади.
«Компания тез ёрдам эҳтиёжларига „UzAuto Motors“ ўз маҳсулотларини бепул тақдим этсин учун, амалдаги қонунга эътироз билдирадими? Йўқ, эътирози йўқ. Агар шундай қонун қабул қилинса, компания уни ижро этишга тайёрми? Зўр мамнуният билан! Бундай қонун лойиҳаси парламентга киритилганми? Ҳар қалай, компания бу ҳақда эшитмаган. Расул Хидралиевич Кушербаев шундай ғоя билан ёки эпидемиологик инқирозни енгиш бўйича бошқа ҳар қандай ташаббус билан оммавий баёнот бердими? Асло йўқ», — дея яъкунлайди компания ўз баёнотини.
