Олий Мажлис Қонунчилик палатаси спикери ўринбосари, «Миллий тикланиш» Демократик партияси фракцияси раҳбари Алишер Қодиров хориждан Ўзбекистон фуқароларини олиб келишни тўхтатишни таклиф қилди.

«Вирусларни аниқлаш ва улар билан курашишда Исроил давлатидаги тажриба ўргангулик. Улар 2020 йилнинг 1 сентябригача барча кирувчилар учун чегараларини ёпди. Нимага? Чунки ичкарига кирган ҳар бир инсон вируснинг янги, бораётган жойидаги муҳитга мослашмаган типини олиб кириши мумкин. Бу янги тўлқин дегани», — деб ёзди у ўзининг Telegram-каналида.

Алишер Қодиров хориждаги фуқароларни турган мамлакатларида даволанишларини молиялаштиришни таклиф қилди.

«Хориждан ватандошларимизни олиб келишни тўхтатиш, уларни турган мамлакатларида даволанишларини молиялаштириш ҳақида ўйлашимиз керак. Бу биринчи навбатда ўша ватандошимизнинг қариндошларига, қолаверса бутун Ўзбекистонга яхшилик бўлади. Яна бир янги штамм халқимиз учун жуда оғир бўлади», — деди у.

Аввалроқ Исроил 18 мартда жорий этилган чет элликларнинг мамлакатга киришини тақиқлаш чораларини 1 сентябрга қадар узайтирган эди. Чеклов хориждан келаётган исроилликларга тааллуқли эмас, улар қайтиб келганларидан кейин 14 кунга карантинга жойлаштирилади.

Май ойида Исроилда коронавирус билан касалланиш ҳолатлари сони қайтадан ўсишни бошлади. Бугунги кунда 52 мингта ҳолат тасдиқланган бўлиб, 22,1 минг киши соғайди, 415 бемор вафот этди.

Июль ойи бошида президент Шавкат Мирзиёев хорижда қолган ва ватанга қайтиш истагида бўлган барча Ўзбекистон фуқароларининг қайтарилишини маълум қилган эди.

Шу мақсадда 20 июлдан 2 августга қадар Россия, Жанубий Корея, Туркия, Беларусь, БАА, АҚШ, Исроил ва Германиядан Ўзбекистон фуқароларини олиб келиш учун 18 та чартер рейс ташкил этилмоқда.