Коронавирус пандемияси даврида Тошкент шаҳридаги тез тиббий ёрдам хизматига мурожаат қилиш сони деярли уч баравар кўпайди, деди соғлиқни сақлаш вазирининг биринчи ўринбосари Абдухаким Хожибоев «Таҳлилнома» дастурида.
«Бир неча ой олдин Тошкент тез тиббий ёрдам хизматига кунига ўртача 2300−2400 мурожаат келиб тушган бўлса, бугунги кунда бу кўрсаткич 2,5−3 баравар ошди ва кунлик мурожаатлар сони 6000 дан ошди. Бу жуда оғир», — деди вазирнинг биринчи ўринбосари.
Абдухаким Хожибоевнинг таъкидлашича, агар 15 июлгача (ўша куни президент тез ёрдам хизматидаги камчиликларни танқид қилган эди) Тошкентда 178 та тез тиббий ёрдам машинаси ишлаётган бўлса, кейинги уч кун ичида уларнинг сони 300 тага етди.
Ҳар бир оилавий поликлиника тезкор бригадасининг ҳаракатланиши учун алоҳида транспорт воситаси бириктирилган. Беморда пневмония бор-йўқлигини текшириш учун рентген ва компьютер томографияси зарур. Вазирнинг биринчи ўринбосари қўшимча равишда ҳар бир поликлиникага рентген аппаратлари, шу жумладан 120 та мобил мослама берилишини маълум қилди.
Унинг таъкидлашича, президент Шавкат Мирзиёев буйруғига кўра вазирлик эндиликда COVID-19 га қарши курашда янги стратегияни қўллайди.
«Илгари тадбирлар ушбу касаллик тарқалишининг олдини олишга қаратилган эди. Ҳозирги вазифа — беморларни тезкор аниқлаш ва уларни тезкор даволаш, пневмония ҳолатининг олдини олиш, беморларнинг ҳаётини сақлаб қолиш, йўқотишларни камайтириш», — деди Абдухаким Хожибоев.
Президент томонидан 15 июль куни бўлиб ўтган учрашувдан кейин зудлик билан янги тез тиббий ёрдам машиналари, тиббий асбоб-ускуналар ва дори-дармонлар сотиб олинди, қўшимча ётоқ-жойлар яратилди.
Бош прокурор Ниғматилла Йўлдошевнинг хабар беришича, эндиликда тез ёрдам машинаси 15 дақиқадан кечикмай келади. 18 июлдан бошлаб шифохоналар беморларни коронавирус тестларисиз қабул қила бошлашди.
