Россиянинг Хабаровск ўлкасида қамоққа олинган губернаторни қўллаб-қувватлаш мақсадида оммавий намойишлар бўлиб ўтмоқда.

Хабаровск ўлкасининг губернатори Сергей Фургал 9 июль куни Россия тергов қўмитаси ва ФХХ томонидан қўлга олинди. Москванинг Басман суди уни 9 сентябргача қамоққа олиб, «Лефортово» СИЗОсига жойлаштирди.

Губернатор 2004−2005 йилларда тадбиркорлик фаолияти давомида суиқасд уюштирганликда айбланмоқда. Ўша йилларда Хабаровск ўлкасида бир неча тадбиркорлар, хусусан Евгений Зоря, Олег Булатов, Александр Адамов ва Роман Сандаловлар ўлдирилган. Тергов қўмитасининг маълумотларига кўра ўша вақтда Фургалнинг ушбу шахслар билан ўзаро низода бўлган. Сергей Фургал барча айбловларни инкор қилиб, ушбу жиноий ишларга алоқаси йўқлигини айтган.

Фургал мамлакат президенти ишончини йўқотганлиги боис истеъфога чиқарилиб, унинг ўрнига ЛДПРнинг Давлат думасидаги депутати Михаил Дегтярёвни вақтинча губернатор вазифасини бажарувчи этиб тайинланди.

Хабаровск губернатори қўлга олинганидан кейин, аҳоли оммавий намойишларга чиқишди. Мамлакат ИВВ сининг маълумотларига кўра, 11 июль кунги митингларда 12 минг киши қатнашган, 18 июль куни намойишлар қатнашчилари сони 10 мингга яқин бўлган. Коронавирус тарқалишининг олдини олиш мақсадида, ҳукумат аҳолини митингларда қатнашишдан тийилишни сўради.

Фото: zimbru_khv / Twitter

Сиёсатшунос Глеб Кузнецов ушбу иш юзасидан изоҳ берар экан, қуйидагича фикр билдирди: «Бу ўлкаларда Фургал оиласи металл ва лом бўйича экспорт-импорт операцияларини амалга ошириб, 90 йиллар ва 2000 йиллар бошида жиноий олам билан муносабатлардан ўзини олиб қочмас эди. Бундан кейин улар сиёсатга ўтиб кетишди, лекин эски алоқалар йўқолмайди».

Унинг сўзларига кўра, жиноий ишни Фургал олиб борган сиёсат билан боғлаш керак эмас. «Мен Фургалнинг губернаторлик фаолиятини ва сиёсий карьера бошлашидан олдин қилган бизнесларини ажратган бўлар эдим», — дейди у.

Алексей Навальныйнинг Хабаровскдаги штаби координатори Алексей Ворсиннинг фикрига кўра, Фургалнинг қўлга олиниши конституцияга ўзгартиришлар учун овоз беришда Хабаровск ўлкасидаги ёмон натижаларга боғлиқ. Янги конституцияга овоз беришда овоз берувчиларнинг 44 фоизи қатнашган, 62 фоиз қатнашганлар ўзгартиришларни маъқуллаб овоз берган.

«Фургал 2005 йилда ташкил этилган суиқасд бўйича айбланмоқда. Ўшандан кейин у ўлка думасида ва 11 йил давлат думасида депутат бўлди, лекин норозилик кайфиятлари фонида губернатор бўлмагунича у ҳуқуқни муҳофаза қилиш органларини қизиқтирмас эди».

Сергей Фургал. Фото: РИА Новости

Алексей Ворсиннинг айтишича, ярим йил олдин Россия президентининг Дальный Восток федерал округи бўйича мухтор вакили Юрий Трутнев Сергей Фургалга унинг Хабаровскдаги рейтинги президент Путиннинг рейтингидан юқори эканлиги учун танбеҳ берганлиги тўғрисидаги аудиоёзув ижтимоий тармоқларда тарқатилган эди.

Ворсиннинг фикрига кўра, Фургал Давлат думаси депутатлигида қолса, жиноий иш очилмаслиги мумкин эди. «Фургал суиқасдларга алоқадор бўлиши мумкинми? Мен умуман ҳайрон бўлмайман. Бу сиёсий ишми? Албатта, ҳа: ҳозир Фургал Давлат думасида қолганида эди, ҳеч қандай Тергов қўмитаси безовталанмас эди», — дейди у.

Маълумот учун, Сергей Фургал 1990 йилларда шифокор сифатида ишлаб, кейинчалик тадбиркорликни бошлаган. У аввал Хитойдан келтирилган маҳсулотлар ва тахта билан шуғулланган бўлса, кейин қора ва рангли металлар ломига ўтган. 2005−2011 йилларда ЛДПР нинг ҳудудий бўлинмаси раҳбари бўлган, Хабаровск ўлкаси думасининг депутати, кейинчалик Россия Давлат думасида депутат бўлган.

2018 йилда Сергей Фургал Хабаровск губернаторлигига сайланади. Ўшанда у 69,57 фоиз овоз тўплаб, амалдаги губернатор «Единая Россия» партияси номзоди Вячеслав Шпортни (27,97 фоиз) устидан ғалаба қозонади.

Орадан бир йил ўтиб, 2019 йил сентябрида ўтказилган сайловларда Фургал партияси ЛДПР энг кўп мандатларни қўлга киритади: Хабаровск думасига, давлат думасига, Хабаровск ҳамда Комсомольск қонунчилик думаларига.