Кучайтирилган тартиб даврида тез тиббий ёрдам ходимлари маошларига қўшимча моддий рағбатлантириш тўловлари белгиланади. Бу ҳақда Адлия вазирлиги матбуот хизмати Вазирлар Маҳкамасининг 20 июлдаги қарорига таяниб маълум қилди.
Қарорга мувофиқ, 2020 йил 20 июлдан коронавирус эпидемияси даврида нормативга қўшимча равишда кечаю-кундуз навбатчилик қиладиган 1 нафар тиббиёт ходими ва 1 нафар ҳайдовчидан иборат ихчамлаштирилган мобил тез тиббий ёрдам бригадалари ташкил этилади/
Шунингдек, кучайтирилган тартиб даврида ҳар ой якунига қадар барча тез тиббий ёрдам бригадаларида ишловчи ходимларнинг лавозим маошига 6 фоиз миқдорида ҳар кунлик қўшимча тўловлар ўрнига қуйидаги миқдорларда қўшимча моддий рағбатлантириш тўловлари белгиланади:
- врач ходимларга — 2,5 млн сўм;
- ўрта тиббиёт ходимларига — 1,5 млн сўм;
- ҳайдовчиларга — 1 млн сўм.
Қорақалпоғистон Республикаси, вилоятлар ва Тошкент шаҳридаги эпидемиологик вазият, шунингдек, тез тиббий ёрдам хизматига кунлик чақириқлар сонидан келиб чиқиб ихчамлаштирилган мобил тез ёрдам бригадаларининг вақтинчалик нормативлари тасдиқланади.
