16 июль куни Тошкент вилоятининг Қибрай туман маъмурий суди Sulton Tex Group компаниясининг Ўзбекистон бош вазирининг аграр ва озиқ-овқат соҳаларини ривожлантириш бўйича ўринбосари Ўктам Барноев, қишлоқ хўжалиги вазири Жамшид Хўжаев ва унинг биринчи ўринбосари Шухрат Тешаевга қарши шикоятини кўриб чиқишни бошлади, дея хабар берди «Газета.uz» га корхона вакили.
Қишлоқ хўжалиги вазирлигининг юридик манзили Қибрай туманида рўйхатда бўлгани сабабли мазкур иш Қибрай туман маъмурий суди судья Ахрорбек Эралиев томонидан кўриб чиқилмоқда.
Ўктам Барноев — пахта ва тўқимачилик кластерлари фаолияти ва салоҳиятини баҳолаш бўйича Республика ишчи гуруҳининг раҳбари, Жамшид Хўжаев — ишчи гуруҳи раҳбарининг ўринбосари, Шуҳрат Тешаев — ишчи гуруҳ аъзоси, пахта ва тўқимачилик кластерлари фаолиятини таҳлил қилиш бўйича республика штаб бошлиғи ҳисобланишади.
Корхонанинг ижрочи директори Нурбек Эргашев суддан юқоридаги ва бошқа мансабдор шахсларнинг баъзи ҳаракатларини ноқонуний деб эълон қилишни сўради. Гап Sulton Tex Group га банк томонидан пахта етиштириш учун кредит сифатида ажратилган 5,6 млрд сўмни ғалла ҳосилини озиқлантириш ва ғалла ўриш комбайнларини таъмирлашга йўналтириш бўйича талаб ва мажбуриятлар қўйилгани ҳақида кетмоқда («Газета.uz» бу ҳақда батафсил ёзган эди).
Бундан ташқари, тадбиркорнинг сўзларига кўра, 8 апрель куни Вазирлар Маҳкамасида бўлиб ўтган йиғилишда келтирилган корхона фаолияти тўғрисида «асоссиз» маълумотларни бериш қонунга зид. Натижада бу Sulton Tex Group`нинг пахта ва тўқимачилик кластерлари рўйхатидан чиқарилиши ва унинг ўрнига кооперация яратилиши (фермерларни кластер билан шартномаларни тўхтатиш ва кооперативга ўтишга мажбур қилиш орқали), шунингдек пахта тозалаш заводи ва бошқа қурилмаларнинг тортиб олинишига олиб келди. Буларнинг барчаси Ўктам Барноев томонидан имзоланган ҳукуматнинг 8 апрелдаги йиғилиш баённомасида кўрсатилган.
Нурбек Эргашевнинг таъкидлашича, протокол Адлия вазирлигида юридик экспертизадан ўтмаган, аммо у шу ҳолда ҳам кучга киритилган, оқибатда бу хусусий корхонанинг қонуний манфаатларига зарар етказган.
Тадбиркорнинг таъкидлашича, 25 март куни Республика ишчи гуруҳи ўз хулосасида Sulton Tex Group`га ўз фаолиятини кластер сифатида давом эттиришга рухсат берган, аммо икки ҳафтадан сўнг у компанияни кластерлар рўйхатидан чиқариш ва кооперацияни йўлга қўйиш тўғрисида хулоса қилди.
Шунингдек, Нурбек Эргашев суддан айбланувчиларга корхона ҳуқуқларини тиклаш мажбуриятини юклашни, яъни 15 минг гектар майдонда кластер фаолиятини қайта тиклашни талаб қилмоқда.
«Биз Sulton Tex Group`га тегишли протокол пунктларини олиб ташлашни сўрадик. Бундан ташқари, Ўктам Барноевнинг протоколи ҳуқуқий экспертизадан ўтмади. Корхонамиз фаолиятини давом эттириш учун қайсиниси муҳим: йиғилиш баённомасими ёки Вазирлар Маҳкамаси ва президент қарорларими? Ҳозир компаниямиз тўхтаб қолган, ускуналар, стимуляторлар, минерал ўғитлар туриб қолди. Буларнинг ҳаммаси раҳбарларнинг пухта ўйланмаган қарорлари, босимлари сабабли содир бўлди. Буни ҳал қилиш учун биз судга мурожаат қиламиз. Биз адолат қарор топиши учун охиригача курашамиз. Бошқа иложимиз йўқ», — маълум қилди у «Газета.uz»га.
Тадбиркор 100 млн долларлик бир-бири билан боғлиқ бўлган 15 та йирик лойиҳани амалга оширишда иштирок этганини ва кластерни тугатиш тўғрисидаги қарор қишлоқ хўжалигининг катта техникалар паркининг ишламай қолишига олиб келгани, натижада бу уни банкрот қилиши мумкинлигини таъкидлади. Шу сабабли, у аввалроқ Қарши туман ҳокими Мақсуда Мустафаева ва бошқа мансабдор шахсларни судга берган.
Суд аризани қисман қаноатлантирди, ҳокимнинг хатти-ҳаракатлари ноқонуний ва Silver fiber agro kooperatsiyasi рўйхатдан ўтганлиги тўғрисидаги гувоҳнома ҳақиқий эмас деб топилди. Аммо ҳоким бошчилигидаги Халқ депутатлари вилоят кенгаши судининг қарорига қарши чиқди.
Бундан ташқари, 10 июль куни Қашқадарё вилоят суди ҳокимият ва кооперациянинг мурожаатномаси ҳамда Қарши тумани прокуратурасининг норозилиги доирасида туман судининг қарорини кўриб чиқишни бошлади.
