Ёшлар иттифоқи марказий кенгашида ишловчи ходимларда коронавирус юқтириш ҳолати кузатилганлиги сабаб марказий кенгаш биноси карантинга ёпилди. Бу ҳақда «Газета.uz»га ЁИ матбуот котиби маълум қилди.

Матбуот котиби Нодир Абдуқодиров ҳозирда Марказий кенгаш биносида ҳеч ким ишламаётганини ва бино дезинфекция қилиш учун ёпилганини айтди.

Маълумотга кўра, касалланганлардан биттаси уйда масофадан туриб ва яна бири ташикилот биносига келиб ишлаётган бўлган.

«Шуни маълум қилмоқчимизки, юртимизда эълон қилинган карантин муносабати билан Ёшлар Иттифоқи Марказий Кенгашининг аксарият ходимлари 10 июлдан бошлаб онлайн (масофадан) ишлашга ўтказилган эди. ОАВ ва ижтимоий тармоқларда касалланган ходимлар сони 10 га яқин деган хабарлар асосга эга эмас.

Бинода қўриқлаш хизмати ва дезинфекция ишларини амалга ошираётган махсус ходимлардан бошқа ишчилар йўқ. Марказий Кенгаш биносида мунтазам тарзда дезинфекция тадбирлари амалга оширилмоқда", — деб ёзган Ёшлар иттифоқи матбуот котиби Нодир Абдуқодиров.

Шунингдек, янги ташкил қилинган Ёшлар ишлари агентлиги раиси ўринбосари Дилноза Каттахонова ўзида COVID-19 аломатлари сезилаётганини маълум қилди.