Март-апрель ойларида Ўзбекистонда коронавирус пандемияси эълон қилингани сабаб пул ўтказмаларининг трансчегаравий бозори қулади. Май ойида пул ўтказмалари ҳажми тиклана бошлади ва июнь ойида кўрсаткичлар етарлича барқарорлашди. Бу ҳақда Марказий банк матбуот хизмати маълумот берди.
Шундай қилиб, йил бошидан бери мамлакатда қабул қилинган пул ўтказмалари ҳажми 2,4 млрд долларни ташкил этди, бу ўтган йилнинг шу даврига нисбатан 156 млн долларга ёки 6 фоизга кам.
Худди шу даврда 427 млн доллар чет элга юборилган, бу 2019 йилнинг биринчи ярмидан 40 млн доллар ёки 9 фоизга кам.
Хабар қилинишича, июнь охирида Ўзбекистонга 621 млн доллар юборилган. Ҳозирча бу йил бошидан бери энг юқори кўрсаткич. Масалан, карантиндан олдинги даврда январь ойида республикага 400 млн, февралда эса 385 млн доллар юборилган.
Коронавирус пандемияси эълон қилиниши билан трансчегаравий пул ўтказмалари бозори қулаган эди. Масалан, март ойида пул ўтказмалари 296 млн долларгача, апрелда 250 млн долларга камайди. Май ойида эса пул ўтказмалри ҳажми тиклана бошлади — 485 млн доллар юборилди.
Апрель ойида Жаҳон банки 2020 йилда глобал пул ўтказмаларининг энг катта қисқариши кутилишини тахмин қилган эди. Россия пул ўтказмаларига юқори даражада боғлиқлик Ўзбекистон, Қирғизистон ва Тожикистон давлатлари иқтисодиётига салбий таъсир кўрсатиши таъкидланган эди.
