Дунёдаги биринчи COVID-19 вакцинаси клиник синовлардан муваффақиятли ўтди. Сеченов университетида (Россия) ўтказилган синов натижаларига кўра вакцина инсон учун зарарсиз эканлиги аниқланди, дея хабар берди РИА Новости.
Вакцинанинг ўзи Н. Ф. Гамалея номидаги Миллий эпидемиология ва микробиология илмий маркази мутахассислари томонидан ишлаб чиқилган. Клиник синовлар ўтказиш 18 июндан бошланган эди. Синов учун кўнгиллилар тиббий кўрикдан ўтказиб танлаб олинган ва улар изоляцияланган.
Биринчи кўнгиллилар гуруҳи 15 июль куни, иккинчи гуруҳ эса 20 июль куни касалхонадан чиқарилади. Вакцинанинг иккинчи босқич синови юзасидан эмлаш ишлари 28 июлгача амалга оширилади.
Гамалея институти тадқиқотчилари COVID-19 вакцинасини рўйхатдан ўтказиш 2−4 августгача ҳал қилинади дея умид қилишмоқда. Шунингдек, вакцинация учун рухсат олишга ҳам бир неча кун керак бўлади.
Тадқиқотчилар вакцинани 14−15 август саналарида фуқароларга тақдим этишни бошлашни тахмин қилишмоқда. Гамалея институти директори Александр Гинцбургнинг айтишича, август ойининг ўртасигача режа бўйича иккинчи босқич синовлари якунига етказилади.
Шунингдек, Гинцбург вакцинанинг икки маротаба қилиниши зарурлигини айтди. Унинг сўзларига кўра, биринчи синов пайтида вакцина қилинган шахслар яна бир бор эмланади.
«Тажриба шуни кўрсатадики, масалан, агар Эболадан сиз ўзингизни бир марта эмлаш билан чекласангиз, унда сиз беш-олти ойгача сиз ушбу инфекциядан ҳимоя даражасига эга бўласиз. Кўрсаткич беш-олти ёки етти ой эмас, балки икки йил ёки ундан кўп бўлиши учун иккинчи марта эмлаш керак», — тушунтирди Александр Гинцбург.
ЖССТнинг Россиядаги вакили Мелита Вуйнович Россия олимларининг коронавирусга қарши вакцина яратиш бўйича ҳаракатларини олқишлади ва Гамалея институти олимлари ишлаб чиққан вакцинанинг аслида номзод вакциналар глобал ландшафтида мавжуд эканлигини, бу фақат биринчи босқич синовлар эканлигини таъкидлади. Унинг хабар беришича, номзод-вакциналар ҳақидаги барча маълумотлар глобал платформага жойлаб борилади ва ЖССТ барча давлатларни ушбу бирлашган платформа орқали ишлашга чақиради.
