Жаҳон соғлиқни сақлаш ташкилоти коронавирус инфекциясининг кунлик тасдиқланиш ҳолати яна рекорд даражага ошганини маълум қилди — кунига 230 мингдан зиёд. Бу ҳақда Guardian хабар берди. Аввалги глобал рекорд жума куни қайд этилган эди.

ЖССТ маълумотларига кўра, дунёда кунига 5 минг нафар бемор коронавирусдан вафот этмоқда.

Жонс Хопкинс университети эса дунёда коронавирусдан вафот этиш ҳолатлари шу пайтгача 570 мингга етганини маълум қилади. Шунингдек, қайд этилган касаллик ҳолатлари 12,93 млндан ошган.

ЖССТнинг хабар беришича, АҚШ яна кунлик энг кўп касаллик аниқланган мамлакатлар рўйхатида биринчи ўринда — бир кунда 66 мингдан ортиқ касаллик қайд этилди. Шунингдек, Бразилия, Ҳиндистон ва Жанубий Африка Республикаси каби мамлакатларда ҳам 12 июль куни касаллик кўрсаткичлари анча ўсган.

Хусусан, Жанубий Африкада вазият тубдан ёмонлашгани сабаб ҳукумат спиртли ичимликларни сотишни тақиқлаш ва кунлик комендантлик соати жорий этишга қарор қилди.

Таъкидлаш жоизки, касаллик ҳолатлари бўйича АҚШ биринчи ўринда эканлигига қарамай, 12 июль куни Нью-Йорк шаҳрида илк бор COVID-19 сабаб ўлим ҳолатлари аниқланмади, дея хабар берди Bloomberg.

Нью-Йорк шаҳрида коронавирусдан вафот этган илк бемор ҳақида 11 март куни хабар берилган, 7 апрелга келиб эса кунлик ўлим кўрсаткичлари энг юқори чўққига — 597 тага чиқди. Бу борада Нью-Йорк штатидаги рекорд кўрсаткич эса 9 апрель куни кузатилган − 799 та ўлим ҳолати.

Эслатма ўтамиз, апрель ойида Нью-Йоркда коронавирусдан вафот этганлар орасида аввал икки нафар, кейин яна бир нафар ўзбекистонликнинг вафот этгани ҳақида хабар берган эдик.