Илон Маскнинг бойлиги 10 июль куни Tesla акцияларининг ўсиши ҳисобига 6,1 млрд долларга кўпайди. Уоррен Баффет эса ҳафта бошида хайрия ишларига 2,9 млрд доллар ажратди. Шунинг ҳисобига Илон Маск дунёнинг энг бой инсонлари рўйхатида Уоррен Баффетни ва яна тўрт миллиардерни ортда қолдирди, дея хабар берди Bloomberg.
Bloomberg Billionaires Index рейтингига кўра, 10 июль куни Tesla акцияларининг нархи 11 фоизга кўтарилгач, Илон Маскнинг бойлиги 6,1 млрд долларга ортди. Ҳозирда Маскнинг умумий бойлиги 70,5 млрд долларга баҳоланмоқда.
Маск бир вақтнинг ўзида бир нечта миллиардерларни ортда қолдириб, рейтингда еттинчи поғонага кўтарилди. Баффетдан ташқари, Tesla раҳбари L’Oreal нинг раҳбарларидан бири Франсуаза Бетанкур-Майерс, Oracle асосчиларидан бири Ларри Эллисон, Reliance Industires компаниясининг эгаси ва Осиёнинг энг бадавлат инсони Мукеш Амбаниларни, шунингдек Google асосчиси Сергей Бринни ортда қолдирди.
Bloomberg маълумотларига кўра, 49 ёшли Илон Маск Tesla компаниясининг бешдан бир қисмига эгалик қилади ва бу унинг бойлигининг асосий қисмини ташкил этади. Бу йил электр транспорт воситалари ишлаб чиқарувчи компания акцияларининг қиймати 269 фоизга ошди. Илон Маск, шунингдек, SpaceX акцияларининг энг катта қисмига эгалик қилади, компаниянинг Маскга тегишли акцияларининг умумий қиймати 15 миллиард долларга баҳоланмоқда.
Эслатиб ўтамиз, аввалроқ Tesla компаниясининг акциялари 1000 АҚШ долларлик маррани босиб ўтгани ва компания автомобиль ишлаб чиқарувчи энг қиммат компанияга айлангани ҳақида хабар берган эдик.
