13 июлдан маҳаллий йўналишлардаги поездлар ва авиа қатновлар тўхтатилади, дея хабар берди Транспорт вазирлиги ахборот хизмати раҳбари Наврўз Ашурматов.
У️нинг сўзларига кўра, Республика махсус комиссияси қарори билан, 10 июлдан эътиборан республика миқёсида қатор чеклов чоралари ўрнатилган. Жумладан:
- 10 июль санасидан автобуслар ҳаракати вақтинча тўхтатилади;
- 13 июль, душанба кунидан маҳаллий йўналишлардаги поездлар ва авиа қатновлар ҳам тўхтатилади;
- Кучайтирилган карантин тартиби шароитида фақатгина Республика махсус комиссияси томонидан тасдиқланган парвозлар жадвалига мувофиқ, хорижий давлатлардаги фуқароларимизни ватанга олиб келиш бўйича репатриацион рейслар бажарилади;
- Чегара пунктларидан фуқароларни карантин ҳудудларига етказиш учун автобус ташувлари амалга оширилади.
Шунингдек, карантин муддатини ўтаб бўлган фуқароларни реабилитация учун шифохоналарга ва яшаш манзилларига етказишда темирйўл ва автобуслардан фойдаланилади.
Бундан ташқари, Наврўз Ашурматов маълум қилишича, Санитария-эпидемиологик осойишталик агентлиги томонидан «сариқ» ва «яшил» тоифага киритилган мамлакатлардан чартер рейслари келиб тушган аризаларга мувофиқ ташкил этилади.
Таъкидланишича, 10 июль — 1 август кунлари учун 5900 поезд чипталари сотилган. Карантин талабларининг кучайтирилиши ва темир йўл алоқаси чекланганлиги сабабли, йўловчилар сотиб олган чипта пуллари тўлиқ қайтариб берилади.
Муайян давр учун «Ўзбекистон ҳаво йўллари» Тошкент-Нукус, Тошкент-Урганч ва Тошкент-Термиз рейсларига 332 чипталарни сотгани маълум қилинди. Наврўз Ашурматов бу авиачипталар бир йил давомида ваучер сифатида амал қилшини айтиб ўтди. Йўловчилар ҳаво қатновлари тиклаганидан кейин улардан фойдаланишлари мумкин бўлади.
«Тошшаҳартрансхизмат» компанияси 1-дан 10 августгача йўловчилар томонилан сотиб олинган ойлик йўл карталари ва жетонларни қабул қилади ва фойдаланилмаган кунлардаги маблағларни қайтариб беради.
