Ўзбекистон ҳудудида биринчи бемор 15 март куни қайд этилган бўлса-да, касаллик мамлакатимизга ундан аввал ҳам кириб келган бўлиши ҳам мумкин, дея фикр билдирди Санитария-эпидемиологик назорат инспекцияси бош инспектори Нурмат Отабеков АОКАда бўлиб ўтган Махсус комиссиянинг карантин чораларини кучайтириш борасидаги қарорига бағишланган брифингда.
«Биз биринчи аниқлаган беморимиздан сарҳисобни бошладик. Шундан кейин статистик рақамлар шаклланди. Бир жиҳатга эътибор берайлик. Ўзбекистон ҳудудида биринчи бемор 15 мартда қайд этилди. Бироқ касаллик мамлакатимизга ундан аввал ҳам кириб келган бўлиши ҳам мумкинлигини инкор этмаймиз», — деди Нурмат Отабеков.
Шунингдек, у бундай вазиятда нафақат тиббиёт, Ички ишлар, Миллий гвардия, ОАВ, ҳокимликлар ёки муайян соҳа вакиллари, балки барча фуқароларнинг роли катта эканини таъкидлади.
«Айнан қарс икки қўлдан чиқадиган вазият мана бугун биз учун асқотади. Шундай экан, халқимиз мутахассисларнинг фикрини тинглаб, унга итоат қилмас экан, унга бўйин эгмас экан, биз вазиятни барқарорлаштира олмаймиз» — дея таъкидлади Санитария-эпидемиологик назорат инспекцияси бош инспектори.
