Президент Шавкат Мирзиёев 8 июль куни бўлиб ўтган видеоселектор йиғилишида Ўзбекистон-Қозоғистон ва Россия-Қозоғистон чегараларида қолиб кетган ўзбекистонликларни қайтаришга ваъда берди.
«Кун сайин Ўзбекистонда шу касаллик (коронавирус — таҳр.) билан зарарланиш сони кўпайиб бормоқда. Че эллардан шу бугунгача 90 мингдан кўп фуқароларимизни қайтариб олиб келдик. Яна бир марта бугун халқимизга мурожаат қилиб айтмоқчиманки, чет элда қолган ҳамма фуқароларимизни, албатта, олиб келамиз», — деди давлат раҳбари.
Унинг сўзларига кўра, у назорат-ўтказиш пунктларида қолиб кетган фуқароларни олиб келиш бўйича топшириқ берган. «Тизим билан, тартиб билан, албатта, уларни олиб келамиз», — дея таъкидлади Шавкат Мирзиёев.
Аввал хабар қилганимиздек, Россия-Қозоғистон чегарасида 2000 нафарга яқин ўзбекистонликлар ўз уйларига Қозоғистон орқали автотранспортларда қайтиш учун йиғилиб қолган. Бундан ташқари, Қозоғистон билан чегарадаги «Жибек жолы» — «Ғишткўприк» НЎПда ҳам ватанга қайтишни кутаётган 3000 дан ортиқ ўзбекистонлик йиғилган. Ўзбекистон ТИВ чегара орқали ўтишдаги чекловни техник сабабларга боғлади ва ушбу масала «қисқа муддатларда» ҳал этилишига ваъда берди.
