Ўзбекистон президенти Шавкат Мирзиёев 8 июнь куни бўлиб ўтган видеоселектор йиғилишида ҳудудларда тадбиркорликни ривожлантириш ҳамда бюджет тушумларини сўзсиз таъминлаш чора-тадбирлари муҳокама қилинди, дея хабар берди давлат раҳбари матбуот хизмати.
Йиғилишда президент тадбиркорлар карантин қоидаларига амал қилишда санитария ва ёнғин хавфсизлиги идоралари томонидан тушунарсиз ва бир-бирига зид талабларга дуч келаётганини таъкидлади.
Шу боис, тадбиркорларнинг мурожаатлари ва таклифлари асосида жорий тартибларни қайта кўриб чиқиб, оммавий ахборот воситалари ва ижтимоий тармоқларда тушунарли шаклда аҳолига етказиш топшириғи берилди.
Аввалроқ «Газета.uz» Тошкент рестораторлари назорат органлари томонидан карантин талабларига турлича ёндашилаётганидан шикоят қилаётгани ҳамда умумий овқатланиш учун аниқ ва тушунарли қоидалар ишлаб чиқилишини сўрагани тўғрисида ёзган эди.
