Соғлиқни сақлаш вазирлиги Қорақалпоғистон Республикаси ва Навоий вилоятида коронавирус инфекцияси аниқланган беморларнинг ҳаётдан кўз юмганини маълум қилди.
Нукус шаҳрида яшовчи 56 ёшли З.Д. (аёл)да 23 июнь куни COVID-19 аломатлари кузатилишига қарамасдан, ҳеч кимга мурожаат қилмасдан уйида ўзи даволанган. 29 июнь куни эса тана ҳарорати тушмаганлиги сабабли тез тиббий ёрдам машинасида Республика юқумли касалликлар шифохонасига олиб борилган ва изоляторга жойлаштирилган. Шу куни инфекциясига намуна олинган ва унда ушбу касаллик тасдиқланган.
Бемор бир неча йил давомида гипертония, юрак ишемик касаллиги билан даволаниб юрган ва назоратда турган. Бундан ташқари, у зўриқиш стенокардияси, гипертония касаллигининг 3-даражаси, артериал гипертензиянинг 3-даражаси, қандли диабетнинг 2-тури, семизликнинг 2-даражасидан ҳам даволаниб келган.
Навоий шаҳрида яшовчи 52 ёшли Б.А. (эркак) эса жорий йил 30 июнь куни тез тиббий ёрдам машинасида шифохонага «COVID-19» инфекциясига гумон билан олиб келинган. Унга COVID-19, икки томонлама бронхопневмониянинг ўта оғир кечиши ташхиси қўйилган. Касаллик ўткир юрак қон-томир ва нафас етишмовчилигининг 3−4-даражаси, ўткир бош мия ва ўпка шиши асоратлари билан кечган.
Бемор бундан аввал гипертония касаллигининг 3-даражаси, артериал гипертензия, семизликнинг 4-даражаси ташхиси билан даволаниб юрган.
Шифохонада ҳар икки беморга ҳам стандартлар асосида реанимацион муолажалар ўтказилишига қарамасдан вафот этди.
Айни вақтда Ўзбекистонда коронавирус асоратларидан вафот этганлар расмий кўрсаткичи 44 нафарни ташкил этмоқда.
