2 июль куни цементни импорт қилиш жараёнини соддалаштириш бўйича ҳукумат томонидан топшириқ берилди, дея хабар берди Монополияга қарши курашиш қўмитаси. Қарор цемент бозорида таклиф даражасини кўтариш ва ички бозорни услуксиз равишда цемент билан таъминлаш мақсадида қабул қилинди.
Таклифлар ва тегишли ҳужжат лойиҳаларини ишлаб чиқиш вазифалари Монополияга қарши курашиш қўмитаси (МҚКҚ), «Ўзстандарт» агентлиги, Давлат божхона қўмитаси ва «Ўзсаноатқурилишматериаллари» ассоциацияси томонидан амалга оширилади. Бунда сифатсиз цемент импорт қилувчилар жавобгарлигини кучайтириш режалаштирилган.
Монополияга қарши курашиш қўмитасининг маълумотларига кўра, бугунги кунда ГОСТ меъёрий ҳужжатлари талабларига кўра импорт қилинган цемент маҳсулотини божхонада расмийлаштириш учун 28 кун лаборатория синовларидан ўтказилади. Фақат ижобий лаборатория хулосаси мавжуд бўлган цемент ички бозорда реализация қилинади. «Бунинг ҳисобига импортидан цемент маҳсулотини олиб кириш ҳажмлари олдинги давларга нисбатан сезиларни камайган», — дейилади хабарда.
Аввалроқ, «Газета.uz» ҳукумат оқ ва портланд цементи импортини бир ойга чеклаб қўйгани ва ушбу қарори билан цемент нархининг кўтарилишини келтириб чиқаргани ҳақида хабар берган эди. Тақиқ 23 апрелда киритилган ва 23 майда олиб ташланган эди. Натижада, январь ойидан бошлаб биржадаги барча цемент маркаларининг нархи бир тонна маҳсулот учун 502 минг сўмдан 797 минг сўмгача, яъни 59 фоизга кўтарилди. Нархларнинг ўсиши асосан май-июнь ойларида, яъни қурилиш мавсумининг бошида содир бўлди.
Ҳукумат буйруғига кўра биржада ҳар бир харидор учун 114 тонна миқдоридаги кунлик лимит белгиланди. МҚКҚ маълумотларига кўра, бу нархларнинг шаклланишига ижобий таъсир кўрсатди. Харид қилган иштирокчиларнинг сони деярли икки баробарга кўпайди. 26 июнь куни 1 тонна цементнинг ўртача нархи 797 минг сўмни ташкил этган бўлса, 30 июнь куни бу кўрсаткич 728,9 минг сўмни ташкил этди.
«Бироқ, мазкур тадбир ҳам цементга бўлган талабнинг юқорилиги сабабли нархларни сезиларли даражада туширилишига ва талабнинг қондирилишига етарлича таъсир этмади, — дея таъкидлади қўмита. — Цементга бўлган талабнинг маҳаллий ишлаб чиқарувчилар томонидан тўлиқ қоплаб берилмаётганлиги сабабли, импорт цементга ҳам эхтиёж ошмоқда».
