Вояга етмаган маҳкумларнинг ота-онаси билан учрашувларида чекловлар бекор қилинди, дея хабар берди Адлия вазирлигининг матбуот хизмати.

Таъкидланишича, бу «Ўзбекистон Республикасининг Жиноят-ижроия кодексига маҳкумларнинг ҳуқуқлари ва қонуний манфаатлари ишончли ҳимоя қилинишини таъминлашга қаратилган ўзгартиш ва қўшимчалар киритиш тўғрисида"ги президент томонидан имзоланган қонунда белгиланган.

Хабарга кўра, вояга етмаган маҳкумларнинг ота-онаси билан учрашувларида чекловлар бекор қилиниши билан бирга маҳкума аёлларнинг вояга етмаган фарзандлари билан учрашувларининг алоҳида тартиби белгиланди.

«Маҳкума аёлларга вояга етмаган болалари билан бир йил ичида 4 марта муддати 5 суткагача бўлган узоқ муддатли учрашув, шунингдек, манзил- колонияларда сақланаётганларга эса муассаса ҳудудидан ташқарида яшаш имконияти билан узоқ муддатли учрашувлар чекланмаган миқдорда берилади», — дейилади хабарда.

Шунингдек, маҳкумларни жазо ўташи даврида адолатли мезонлар асосида рағбатлантириш чораларини қўллаш тартиби ҳамда рағбатлантириш чораларини қўллаш комиссиясининг иш фаолияти ва уларнинг аниқ вазифалари белгилангани маълум қилинди.