Карантин қоидаларини бузгани учун 78 нафар ички ишлар органлари ходими жаримага тортилди, 1 нафари ишдан бўшатилди. Бу ҳақда чоршанба куни «Юксалиш» умуммиллий ҳаракати ташкил этган учрашувда ИИВ матбуот котиби Шоҳрух Ғиёсов маълум қилди.
Унинг сўзларига кўра, вазирлик ИИО сафларини адашиб кириб қолганлардан тозалаш бўйича кўпгина ишлар амалга оширилмоқда.
Масалан 2019 йилда жами 7039 та ходимга нисбатан интизомий жазо қўлланилган. Ундан ташқари, йўл ҳаракат қоидаларини бузган 1223 та ходим жаримага, 133 та ходим жиноий жавобгарликка тортилган.
Бу йил бошидан буён эса 2350 нафар хизмат интизомини бузган ходим аниқланган, 529 нафари йўл ҳаракати қоидаларини бузган, бунга жаримага тортилган ҳамда 45 ходим жиноий жавобгарликка тортилган.
«Мана рақамлар, энди ким айта олади булар ўзиникини бекитади деб. Қонун устиворлигини таъминлаш, сўзда эмас, амалда, хозирда бизнинг биринчи вазифамиздир», — дея таъкидлади Шоҳрух Ғиёсов.
