АҚШ президенти Дональд Трамп йил охиригача чет эллик мутахассислар, уларнинг оила аъзолари ва мавсумий ишчилар учун иш визаларини беришни вақтинчалик тўхтатиб қўйиш қарорини қабул қилди. Бу ҳақда Оқ уй матбуот хизмати хабар берди.
Трамп мазкур қарорни коронавирус пандемияси даврида АҚШ ишчиларини ҳимоя қилиш ва уларни устувор ўринда иш билан таъминлаш мақсадида қабул қилганини айтди. Чеклов йил якунига қадар давом этади. «Баъзи истиснолардан ташқари, кўплаб америкаликлар ишсиз қолган пайтда биз чет эл ишчиларининг АҚШга киришига йўл қўймаслигимиз керак. Кўпгина ишчилар коронавирус туфайли ўзларининг айби билан зарар кўрдилар ва янги чет эл ишчилари билан алмаштирилганда улар четда қолмасликлари керак», — деди АҚШ президенти.
Қарорга кўра, чекловлар H-1B, H-2B, H-4, L-1 ва баъзи J-1 визаларига тегишли бўлади. H-1B визалари — бу асосан технология соҳасидаги малакали мутахассисларга ишлаш учун рухсатномалар. H-4 визалари H-1B виза эгаларининг турмуш ўртоқларига берилади. J-1 визалари фан вакилларига берилади ва L-1 визалари АҚШга кўчиб ўтишдан олдин худди шу компанияда ишлашга кетган топ-менежерларга берилади. H-2B визалари мавсумий ишчилар учун қўлланилади.
Шу билан бирга, Трамп маъмурияти H-1B виза дастурини ислоҳ этишни режалаштирмоқда. Хусусан, мазкур дастур доирасида энг юқори иш ҳаққи таклиф этиладиганларга ва энг юқори малакали талабгорларга устуворлик бериб, ишга қабул қилинишини кўзда тутилади.
«Фуқароларимизнинг ҳаёти ва ишини ҳимоя қиладиган иммиграция тизимини яратиш бизнинг маънавий бурчимиздир», — дея таъкидлади Дональд Трамп.
Маълумот учун, Америка Қўшма Штатлари ҳукумати томонидан мамлакат бўйлаб фавқулодда ҳолат эълон қилинганидан бери 21 миллиондан ортиқ америкаликлар (аҳолининг 13,3 фоизи) ишсизлик учун ёрдам сўраб мурожаат қилган.
Эслатиб ўтамиз, АҚШ раҳбари 22 апрель куни мамлакатга иммиграцияни 60 кунга тўхтатиш тўғрисидаги фармонни имзолаганди.
