Сербиялик теннисчи, жаҳоннинг биринчи ракеткаси Новак Жокович ва унинг рафиқаси Елена Ристич коронавирус инфекциясини юқтириб олишди. Бу ҳақда спорт шарҳловчиси Хосе Моргадо твиттер тармоғига юклаган Жоковичнинг баёнотида маълум бўлди.
Жокович ва унинг рафиқасининг коронавирус учун топширган тести ижобий чиққан бўлсада, жуфтликнинг иккита фарзандида инфекция аниқланмаган. Баёнотда хабар берилишча, Жоковичда хеч қандай аломатлар кузатилмаган. Кейинги 14 кунни у изоляцияда ўтказади.
Сўнгги кунларда Жоковични Хорватияда ўзи уюштирган Adria Tour теннис мусобақаси сабаб танқид қилишаётган эди. Финал босқичидан олдин теннисчи Григор Димитровда коронавирус аниқлангани сабаб мусобақа тўхтатилган эди. The New York Times нинг таъкидлашича, иштирокчилар мусобақада кўплаб муҳлислар олдида қатнашишган, шунингдек, бир-бири билан кучоқ очиб кўришишган ва бирга базм уюштиришган. Жокович Adria Tour нинг коронавирус аниқланган тўртинчи иштирокчисига айланди, дея хабар беради Sky News.
Маълумот учун, Adria Tour мусобақасида асли ўзбекистонлик бўлган пианино устаси Лола Астанова ҳам иштирок этиб, мусиқавий чиқиш қилган эди.
