16 июнь куни тахминан соат 10:20 да Қашқадарё вилоятининг Қамаши туманида 50 минг сўм устида бошланган жанжал бир кишининг ҳаётдан кўз юмиши билан тугади. Бу ҳақда ИИВ Тергов департаменти матбуот хизмати хабар қилди.

Қайд этилишича, «Ифтихор» кўчасида жойлашган фуқаро Э.С. 27 апрель куни «Ҳунарманд» савдо мажмуасидаги дўкони ходими А. Л.дан Redmi 8A русумли уяли телефон аппаратини 1,6 млн сўмга сотиб олган. Э.С. 16 июнь куни шундан тўланмай қолган 250 минг сўм қарзини бериш мақсадида дўконга келганида, А. Л. ундан 300 минг сўм беришини талаб қилиб, у билан ўзаро жанжаллашади. Сўнгра дўкон ташқарисига чиқиб, юзи ва бош қисмига мушти билан бир неча маротаба уриши натижасида Э. С. ерга бош қисми билан йиқилади ва тан жароҳати олиб туман тиббиёт бирлашмасига ётқизилади. Бироқ кўрсатилган тиббий муолажаларга қарамасдан, олган тан жароҳатлари натижасида вафот этади.

Суд тиббий экспертиза хулосасига кўра, Э.С., бош миянинг ёпиқ жароҳати, энса суягининг чизиқли синиши ва бошқа кўринишдаги ҳаёт учун хавфли бўлган «оғир» тан жароҳати олганлиги аниқланган.

Мазкур ҳолат юзасидан Қамаши туман ИИБ ҳузуридаги Тергов бўлими томонидан А.Л.,га нисбатан Ўзбекистон Жиноят кодексининг 104-моддаси 3-қисми «д» банди (жабрланувчининг ўлишига сабаб бўлган қасддан баданга оғир шикаст етказиш) билан жиноят иши қўзғатилиб, гумонланувчи процессуал тартибда ушланган.

Эслатма, мазкур жиноятни содир этган шахс 8−10 йилгача озодликдан маҳрум қилиш билан жазоланиши кўзда тутилган.