Тошкент вилоятининг Юқоричирчиқ туманидаги карантин комплексида эркак киши ўз контейнерида осилган ҳолда топилди, дея маълум қилди «Газета.uz»га Бош прокуратура матбуот хизмати.
Унга кўра, 20 июнь куни соат тахминан 4:00ларда асли Фарғона вилоятидан бўлган фуқаро (1978 йили туғилган) карантинга олинган фуқароларни вақтинчалик сақлаш контейнери ичида ўзини осиб қўйган.
Маълум қилинишича, ушбу киши коронавирус инфекциясини аниқлаш учун таҳлил топширган бўлган, лекин унинг таҳлил натижалари ҳали чиқмаган. Марҳум айнан қачон, қаердан келган, Юқоричирчиқ туманидаги карантин марказига жойлаштирилгани ҳақида ҳозирча маълумот йўқ.
Мазкур ҳолат юзасидан Юқоричирчиқ тумани прокуратураси дастлабки тергов ишларини олиб бормоқда.
Эслатиб ўтамиз, март ойи ўртасида бир вақтнинг ўзида 10 минг кишини қабул қилиши мумкин бўлган Карантин комплекси қурилиши бошланган эди. Ушбу комплекс COVID-19 га гумон қилинган шахсларни сақлаб туриш учун мўлжалланган.
