Ўзбекистонда коронавируснинг енгил шакллари аниқланган ёки касаллик аломатларисиз ўтаётган фуқароларни уй шароитида тиббий назоратда ушлаш ва даволаш амалиёти йўлга қўйилади. Бу ҳақда президент Шавкат Мирзиёев 16 июнь куни бўлиб ўтган видеоселектор йиғилишида маълум қилди.
Аввал хабар қилганимиздек, 12 майдан бошлаб Соғлиқни сақлаш вазирлиги COVID-19дан даволанган беморларни реабилитация қилиш амалиётидан воз кечган эди.
Йиғилишда президент коронавирус билан боғлиқ вазият мураккаблигича қолаёганини таъкидлади. Масалан, Тошкентда сўнгги икки ҳафтада аниқланган 551 та коронавирус ҳолатидан 482 таси аҳоли орасида қайд этилган. 57 та ҳолатда инфекция манбаи номаълумлигича қолмоқда.
Коронавирусга чалинган беморларни уй шароитида даволаш амалиёти дунёнинг кўплаб мамлакатларида, масалан, Буюк Британияда жорий этилган.
