Хитой пойтахти Пекинда охирги 4 кун ичида шаҳарда касаллик бўйича 79 та янги ҳолат аниқланди — Пекинда бундай статистика февраль ойидан бери кузатилмаётган эди, дея хабар берди Reuters. «Синьфади» бозорида вирус тарқалиши ҳолатлари аниқлангач, Пекинда фавқулодда ҳолат эълон қилиниб, мактаблар, спорт иншоотлари ёпилди ва барча тадбирлар бекор қилинди.
Аниқланишича, Пекинда сўнгги икки ой ичидаги илк бор коронавирус аниқланган бемор яқин орада шаҳар ташқарисига чиқмаган ва шаҳарга яқинда келган инсонлар билан мулоқотда бўлмаган. Кейинчалик аниқланишича, у июнь ойининг бошида «Синьфади» бозорида бўлган.
Бир қатор тадқиқотлардан кейин Пекинга вирус Европадан кириб келди, деган хулоса чиқарилди. Эпидемиологлар вирус музлаган гўшт ва балиқ махсулотлари орқали кириб келган бўлиши мумкинлигини ҳам тахмин қилмоқда. Яъни, бу кўпчилик ўйлаганидек «иккинчи тўлқин» эмас, балки бириничисининг давомидир.
Ҳозирда бозордаги барча ишчилар тестдан ўтказилмоқда. Ҳукумат, шунингдек, 30 майдан буён ушбу бозорда бўлган барча 200 минг аҳоли ҳам тестдан ўтказиши лозимлигини таъкидлаб, уларга ҳозирги вазиятда ўз уйларида 14 кунлик каратинда қолишларини тавсия қилди.
Вирус тарқалишининг янги ўчоғи деб топилаётган «Синьфади» чакана бозори Пекин жанубида жойлашган бўлиб, Хитойдаги энг катта бозорлардан бири ҳисобланади. 10 мингдан ортиқ ишчи ишлайдиган бозор Уханьдаги денгиз маҳсулотлари бозоридан 20 марта каттароқ. Бу ердан махсулотлар Пекиндан ташқари Хитойнинг кўплаб шимолий вилоятларига ҳам етказилади.
