Андижон вилояти кичик саноат зоналарини бошқариш ягона дирекцияси Марҳамат тумани етакчи мутахассиси Д.А. тадбиркор ва фуқаролардан тумандаги кичик саноат зонаси ҳудудидан уй-жой қуриш ва тадбиркорлик билан шуғулланиш учун ер майдони ажратиб бериш эвазига пул олаётгандан ушланди. Бу ҳақда Ўзбекистон Бош прокуратураси матбуот хизмати «Газета.uz»га маълум қилди.
Бош прокуратура ҳузуридаги Департаментнинг Марҳамат туман бўлими томонидан ДХХ ходимлари билан ҳамкорликда ўтказилган тезкор тадбирда, Д.А. фуқаро Б.М.га кичик саноат зонаси учун ажратилган ер майдонидан уй-жой қуриш ҳамда тадбиркорлик фаолияти билан шуғулланиши учун 10 сотих ер майдони ажратиб бериш эвазига 1500 долларини олган вақтида ашёвий далил билан ушланган.
Шунингдек, ушбу ҳолат бўйича ўтказилган терговга қадар текширувда, етакчи мутахассис Д.А. жорий йилнинг май ойида 4 нафар фуқаронинг ишончига кириб, тадбиркорлик фаолиятини бошлашга ер ажаратиш учун 6750 долларини ҳамда 1 нафарига туманда қурилаётган кўп қаватли уйдан 2 хонали уй олиб эвазига 27 млн сўмини қўлга киритганлиги аниқланган.
Худди шундай, Департаментнинг Марҳамат туман бўлими томонидан ўтказилган яна бир тезкор тадбирда, фуқаро М.Х фуқаролар З.Р. ва М.Э.нинг ишончига кириб, уларга Марҳамат туман «Деҳқон бозори» МЧЖ ҳудудидан қишлоқ хўжалиги маҳсулотлари билан савдо қилиш савдо растаси ажратиб бериши эвазига 2 млн сўмни фирибгарлик йўли билан олган вақтида ашёвий далил билан ушланган.
Юқоридаги ҳолатлар юзасидан Д.А. ва М.Х.га нисбатан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
