Sony компанияси Future of Gaming онлайн-тақдимотида илк бор Playstation 5 ўйинлар консолини тақдим этди. Янги консоль тўғри бурчак ва қирралардан холис бўлди, уларнинг ўрнини тўлқинсимон ва юмалоқ бурчаклар эгаллади.
Ўйин консоли — видеоўйинлар учун мўлжалланган махсус электрон қурилма. Унинг асосий вазифаси ўйинларни ишга тушириш ва намойиш этиш.
Фото: Playstation.com
Компания консольнинг техник хусусиятларини март ойида тақдим этган эди: 825 гигабайт SSD-диск, маълумот алмашиш тезлиги 5,5 гигабит/секунд. Бундан ташқари, қурилмада саккиз ядроли процессор, 10,28 терафлопс қувватли видеокарта, GDDR6 тезкор оператив хотира ва қўшимча SSD-диск ўрнатиш бўлими ҳам мавжуд.
Консоль икки версияда — диск ўқиш қурилмаси билан ва диск ўқиш қурилмаси мавжуд бўлмаган кўринишда ишлаб чиқарилади.
Видео: Playstation
Шунингдек, Sony компанияси Playstation 5 ўйин консоли учун қўшимча аксессуарлар — Dualsense ўйин қурилмаси (геймпад), пульт, қулоқчин, камера ва геймпадлар учун док-станцияни тақдим этди.
Геймпадлар учун DualSense док-станцияси. Фото: TheVerge
Янги Dualsense геймпадлари DualShock 4 геймпадига қараганда оғирроқ ва USB Type-C кабели орқали қувватланади. Шунингдек, Dualsense учун вибротўлқинлар тизими янада такомиллаштирилди — янги Haptic Feedback вибротўлқинлар технологияси видеоўйинда бўлаётган жараёнга қараб турли хил тактиль ҳиссиётларни ҳис қилишда ёрдам беради.
Компания Playstation 5 консолини сотувга чиқаришни 2020 йилга мўлжаллаган. Унинг нархи ва сотувга чиқарилиш санаси эса ҳозирча номаълум.
Sony компанияси тақдимотда асосий эътиборни видеоўйинлар намойишига қаратди. Бир соат давомида келгусида сотувга чиқадиган ўйинларнинг трейлерини тақдим этди.
Spider-Man: Miles Morales
Spider-Man: Miles Morales ўйинини Spider-Man нинг биринчи қисмини хронологик давоми деб ҳисобласа бўлади. Унинг бош қаҳрамони — Майлз Моралес. The Telegraph билан суҳбатда Playstation компаниясининг Европадаги бизнесни ривожлантириш раҳбари Саймон Раттер янги қисмни «кенгайтирилган ва шу билан бирга олдинги ўйиннинг такомиллаштирилгани» деди.
Spider-Man: Miles Morales 2020 йилнинг охирида сотувга чиқарилади.
Spider-Man: Miler Morales ўйинининг трейлери. Видео: Playstation
Resident Evil Village
Playstation 5 тақдимот давмоида Resident Evil Vlll Village ўйинининг трейлерини тақдим этди. Трейлерга асосланган ҳолда айтиш мумкинки, ўйин нафақат Resident Evil Vll, балки Resident Evil 4 нинг ҳам сюжетини давом эттиради.
Resident Evil Village ўйинининг трейлери. Видео: Playstation
Hitman 3
Hitman 3 ўйини 2021 йилнинг январь ойида сотувга чиқиши маълум қилинди. Шунингдек, у Playstation 4 ўйин консоли билан ҳам ишлайди. Ўйиннинг олдинги қисмларини ўйнаганлар янги версияга биринчи ва иккинчи қисмдаги локацияларни ҳам ўрнатиши мумкин.
Hitman 3 трейлери. Видео: Hitman YouTube-канали
