Наманган вилоятининг Поп туманида 1200 кишилик карантин маркази қурилди, дея хабар қилди вилоят ҳокимлиги ҳузуридаги коронавирус профилактикаси штаби.
Ғурумсарой қишлоғидаги мазкур ҳудуд 2,2 гектар майдонда (карантин ҳудуди ва шифохонанинг умумий майдони 16 гектарни ташкил этади) барпо этилди. Электр, сув ва канализация тармоқлари тортилди.
Бу ердаги махсус контейнерларнинг ҳар бири 26 квадрат метрдан иборат бўлиб, 12 квадрат метрли алоҳида кириш қисмига ҳам эга. Хоналар 4 кишига мўлжалланган, кондиционер, телевизор ва душ билан таъминланган.
Эндиги асосий эътибор карантин ҳудуди билан ёнма-ён жойлашган 150 ўринли шифохона қурилишига қаратилган.
«Бу ерда муолажа хоналари, тиббиёт бўлимлари, ошхона, лаборатория ва дорихона барпо этилади. Ҳозирда 270 нафар муҳандис ва қурувчи, 20 дан ортиқ техника билан икки сменада иш ташкил этилган. Мақсад тез кунларда ушбу объектни ҳам фойдаланишга топширишдан иборат», — дейди қурилиш ишларини олиб бораётган «Сифат кафолат стандарт сервис» қурилиш корхонаси раҳбари Аҳмаджон Мамадалиев.
Эслатиб ўтамиз, 150 ўринли шифохона ва карантин ҳудуди қурилиши жорий йил апрелида бошланган эди. Карантин ҳудуди ва шифохона маъмурият, қабулхона-ташхислаш, лаборатория, дорихона, марказий стирилизация, жарроҳлик, жонлантириш бўлимлари, стационар палаталар, шифохона ва техник ходимларнинг яшаш жойларидан иборат бўлади.
