8 июнь куни Қарши туман маъмурий суди Sulton Tex Group компаниясининг Қарши туман ҳокими Мақсуда Мустафоева ва бошқа мансабдор шахсларга қарши даъвоси бўйича қарор чиқарди.
«Газета.uz» аввал ёзганидек, Sulton Tex Group раҳбари Нурбек Эргашев бош вазирнинг аграр ва озиқ-овқат соҳасини ривожлантириш масалалари бўйича ўринбосари Ўктам Барноевни кластер пахтачилик билан шуғулланишига қарамасдан, 5,6 млрд сўмни ғаллани озиқлантириш учун ўтказиб бериш талабини бажармагани учун босим ўтказиш ҳамда унинг корхонасини пахта-тўқимачилик кластерлари рўйхатидан чиқариб юборганликда айблаган эди. Ҳокимлик йил охиригача кластер билан шартнома тузган фермерларни кооперацияга ўтказишга мажбурлашни бошлаган. Тадбиркор 100 млн долларлик бир-бири билан боғлиқ бўлган 15 та йирик лойиҳани амалга ошириш устида иш олиб бораётгани, мазкур қарор уни банкротга учратиши мумкинлигини маълум қилган эди.
Ишбилармон унинг компаниясини пахта-тўқимачилик кластерлари рўйхатидан чиқариш тўғрисидаги қарорни бекор қилиш, 5,6 млрд сўмни ғаллани озиқлантириш учун ажратиш тўғрисидаги талабни, фермерларни Silver Fiber Agro Kooperasiyasi кооперацияси билан мажбурлаб шартнома туздириш бўйича ҳаракатларни ва уни рўйхатга олиш тўғрисидаги гувоҳномани ноқонуний деб топиш, шунингдек, ҳоким Мақсуда Мустафоевага корхонанинг молиявий-хўжалик фаолиятига аралашмаслик мажбуриятини юклаш учун судга мурожаат қилди.
Нурбек Эргашев (костюмда). Фото: «Дарё».
Нурбек Эргашев, шунингдек, Вазирлар Маҳкамасининг 8 апрелдаги йиғилиш баёнидаги фаолиятини тўхтатаётган кластерларга бириктирилган ёғ-мой заводлари, бино ва иншоотларни қайтариш ҳамда Sulton Tex Group фаолиятини тўхтатиш ва ўрнига фермер хўжаликлари кооперациясини ташкил этиш тўғрисидаги талабларни бажаришни бекор қилишни ҳам сўради.
Суднинг ҳал қилув қарорига (қарор «Газета.uz» ихтиёрида мавжуд) кўра, суд Sulton Tex Group аризасини қисман қаноатлантирди.
Тадбиркор бош вазир ўринбосари Ўктам Барноевга тақдим этилган асосланмаган маълумотлар кластер фаолиятини тўхтатиш ва фермерларни кооперативларга ўтказиш тўғрисидаги қарорнинг қабул қилинишига сабаб бўлганини маълум қилди. Аризачи судда буни исботлаб бера олмагани сабабли мазкур талаб рад этилди.
Суд, шунингдек, ҳоким Мақсуда Мустафоева ва бошқа мансабдор шахсларнинг фермер хўжаликлари раҳбарлари ва янги кооперация ўртасида контракция шартномаларини тузиш шароитига олиб келган ҳаракатларини ноқонуний деб топди.
Ҳокимнинг Sulton Tex Group тўғрисида Қашқадарё вилояти ҳокими Зойир Мирзаев ва бош вазир ўринбосари Ўктам Барноевга хат йўллагани билан боғлиқ хатти-ҳаракатлари ҳам қонунга зид деб топилди.
Давлат хизматлари агентлигининг Silver Fiber Agro Kooperasiyasi компаниясини рўйхатга олиш билан боғлиқ ҳаракатлари ноқонуний, унинг 27 апрелдаги рўйхатга олиш тўғрисидаги гувоҳномаси эса ҳақиқий эмас деб топилди.
Қарши туман ҳокими ва бошқа мансабдор шахсларга Sulton Tex Group молиявий-хўжалик фаолиятига, айнан қилиб айтганда, компания ва фермер хўжаликлари ўртасидаги контракция шартномаларини бекор қилиш ёки ўзгартириш, шунингдек, банк ҳисоб рақамларини туман филиалларига кўчириб ўтказиш билан боғлиқ масалаларга аралашмаслик мажбурияти юкланди.
Шу билан бирга, компания пахта хом ашёсини етиштириш билан шуғулланса ҳам, ғаллани озиқлантириш учун 5,6 млрд сўмни ўтказиб бериш ҳукумат қарорини бекор қилиш бўйича талаб иш юритувидан чиқарилди. Суд буни ушбу ҳаракатларда ижтимоий хавфли қилмишга ўхшаш ҳаракатлар мавжудлиги ва мазкур масала маъмурий судга алоқадор эмаслиги билан изоҳлади.
Бундан ташқари, Ўзбекистон Вазирлар Маҳкамасининг 8 апрелдаги баённомасидан ўрин олган ўз фаолиятини тўхтатаётган пахта-тўқимачилик кластерига бириктирилган ёғ-мой заводлари, бино ва иншоотларни қайтариш ҳамда Sulton Tex Group пахта-тўқимачилик кластери фаолиятини тўхтатиш ва унинг ўрнига фермер хўжаликлари кооперациясини ташкил этиш кўзда тутилган банднинг бажарилмаслиги бўйича талаб ҳам иш юритувидан чиқарилди. Мазкур баённома халқ депутатлари Қарши туман кенгаши томонидан муҳокама қилингани, маъмурий суд эса кенгаш қарори қонунийлигини баҳолашга ваколатли эмаслиги қайд этилди.
Кластер билан шартнома тузган фермерларнинг кооперация билан контракция шартномаларининг қонунийлигини текшириш ҳам иш юритувидан чиқарилди. Бу ишнинг ҳам маъмурий судга алоқадор эмаслиги қайд этилди.
Ер кимнинг тасарруфига ўтади, кластернинг кейинги тақдири нима бўлади?
Қарши туман ҳокимлиги матбуот хизмати ўз хабарида Silver Fiber Agro Kooperasiyasi билан ишлаган фермер хўжаликлари қонуний шаклда кооперацион тизим ташкил этган ҳолда суд талаби асосида у билан ишлашда давом этишларини қайд этди.
«Ер майдонлари эгалари судда ўз фаолиятини давом эттиришни хоҳлашаётганини маълум қилишди. Кластерга тегишли 13 мингдан зиёд гектар майдондаги ер кооперацияга ўтказилади. Суд шу билан мажлисни якунлади», — дейилади маъмурият хабарида.
Sulton Tex Group бўлим бошлии Ғиёс Рўзиев «Газета.uz»га компания 15 минг гектар ер билан ишгани, 13 минг гектар ер кооперацияга берилганидан кейин компания тасарруфида ўзининг 2000 гектар ери қолганини маълму қилди.
«Вазирлар Маҳкамасининг кластерни тугатиш тўғрисидаги баённомаси ҳаттоки Адлия вазирлигида ҳуқуқий экспертизадан ўтказилмаган. Президент қарори каби юқори турувчи ҳужжатлар бор. Ҳозир биз тушунарсиз вазиятга тушиб қолдик. Саволлар кўп, жавоблар оз. Бир томондан, биз — кластермиз, биздан ерни олиб, гувоҳномаси суд томонидан ҳақиқий эмас деб топилган кооперацияга беришмоқда», — деди у.
Унинг сўзларига кўра, компания кейинги қарорни қабул қилиш учун суд қарорини таҳлил қилмоқда.
