Олий Мажлис Қонунчилик палатаси депутатлари ҳокимларнинг айрим ваколатларини чеклаш таклиф этилаётган янги қонун лойиҳаси кўриб чиқмоқда. Бу ҳақда парламент матбуот хизмати хабар берди.

Қайд этилишича, Олий суд томонидан қонунчилик ҳуқуқи ташаббуси асосида тақдим этилган «Мулкдорлар ҳуқуқлари ва қонуний манфаатлари кафолатлари янада кучайтирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида"ги қонун лойиҳаси парламентнинг қуйи палатасига кўриб чиқиш учун киритилди.

Қонун лойиҳасида ер участкаларининг ҳокимлар томонидан олиб қўйилишига таъқиқ белгилаш, ер участкасига эгалик қилиш ва ундан фойдаланиш, шунингдек, ер участкасини ижарага олиш ҳуқуқини тугатиш бўйича уларнинг ваколатларини чеклаш таклиф этилмоқда.

Хабарга кўра, ер участкаларини давлат ва жамоат эҳтиёжлари учун, шунингдек, инвестиция лойиҳаларини амалга ошириш учун олиб қўйиш ваколатини Қорақалпоғистон Жўқорғи Кенгесига, халқ депутатлари вилоятлар ва Тошкент шаҳар Кенгашларига бериш назарда тутилмоқда.

Шу билан бирга, ҳеч ким суд қарорисиз мулк ҳуқуқидан маҳрум қилишга ёки уни чеклаб қўйишга ҳақли эмаслиги қонунда мустаҳкамлаб қўйилиши маълум қилинди.

«Хусусийлаштирилган хусусий мулк бўлган ер участкасини олиб қўйиш, башарти у национализация қилинадиган бўлса, фақат давлат ва жамоат эҳтиёжлари учун ҳамда ер участкаси мулкдорининг розилиги олинганида, хусусийлаштирилган ер участкасининг шартнома қиймати ва бошқа зарарларнинг ўрнини давлат томонидан олдиндан қоплаш шарти билангина, башарти у реквизиция қилинадиган бўлса, хусусийлаштирилган ер участкасининг мулкдорига етказилган зарарлар ва бошқаларнинг ўрнини қоплаш шарти билан амалга оширилишини назарда тутиш таклиф этилмоқда», — дейилади хабарда.

Маълум қилинишича, айни пайтда мазкур қонун лойиҳаси Қонунчилик палатасида биринчи ўқишда кўриб чиқиш учун масъул қўмита томонидан тайёрланмоқда.