Хитойнинг Huawei компанияси 3 июнь куни ўзининг тана ҳароратини ўлчаш имкониятига эга янги Honor Play 4 Pro смартфонини тақдим этди.
Arstechnica берган хабарга кўра, смартфоннинг орқа камерасига инфрақизил ўлчагич ўрнатилган ва тана ҳароратини ўлчаш учун уни пешонага яқинлаштириш керак бўлади. Ундаги инфрақизил ўлчагич -20 дан 100 гача бўлган даражадаги ҳароратни кўрсата олади.
Смартфондаги термометрдан нафақат тана ҳароратини ўлчашда, балки бошқа мақсадларда, шу жумладан сув ҳарорати ёки хона ҳароратини ўлчаш учун ҳам ишлатиш мумкин.
Смартфон 128 ГБ флеш-хотирага ва 8 ГБ оператив хотирага эга. Шунингдек, мобил қурилма 162,7×75,8×8,9 мм ҳажмга эга бўлиб, унинг оғирлиги 213 граммни ташкил этади. iXBT сайтининг хабар беришича, Honor Play 4 Pro смартфонининг нархини 422$ этиб белгиланган ва у 9 июндан бошлаб Хитойда сотувга чиқарила бошланди.
Ушбу турдаги смартфонлар ҳозирги пандемия даврида 2020 йилнинг энг қулай гаджети бўлиши кутилмоқда. Бироқ Arstechnica смартфонлар термометр вазифасини аниқ бажара олмаслиги мумкинлиги хақида огоҳлантирган.
