Ўзбекистон Туркия билан бир вақтда жорижлик сайёҳларни қабул қилишни бошлайди. Бу ҳақда президент Шавкат Мирзиёев чоршанба куни бўлиб ўтган йиғилишда маълум қилди.
Йиғилишда сўнгги ўн кунда коронавирус тарқалиши суратларининг ошиб бориши таъкидланди. Охирги бир ойда 32 та чартер рейс орқали 8 мингга яқин, чегара постлари орқали 20 мингдан ортиқ фуқаролар мамлакатга олиб келинган. Уларнинг кўпчилигида касаллик топилган.
«Қарийб 200 нафар халқаро юк ташувчи ҳайдовчида коронавирус аниқланган. Умуман, ҳозирги кунда уй шароитида 26 минг, стационарда 21 минг киши карантинда қолмоқда», — дейилади хабарда.
Президент 50 тага яқин шаҳар ва туманлар «қизил» ва «сариқ» ҳудудлар ҳисобланишини эслатиб ўтди.
«Мана 1 июндан бошлаб ички туризмни ривожлантиришга катта эътибор бердик. Энди шу билан бирга ташқи туризмда ҳам қаерда улар бизни қабул қилишга тайёр бўлса, биз ҳам тайёр бўламиз. Биз дарров самолётларимизни учирамиз. Мана, Туркия билан гаплашаяпмиз, улар ташқи туризмни очганидан, биз ҳам очамиз», — дея таъкидлади Шавкат Мирзиёев.
«Дунёда вазият ҳамон ўта оғир ва мураккаблашиб бораяпти. Мана кўп олимлар, мутасаддиларни агар ўқисангиз, куз билан қишда коронавирус тарқалиши давоми бўлиши мумкинлиги тўғрисида гапиряпти. Булар беккорга гапирмаяпти. Биз ҳамма нарсага тайёр бўлишимиз керак. Бу қанча давом этади, ҳеч ким билмайди. Иқтисод нуқтаи назаридан, ҳар бир кунимиз бизга қарши ишлаяпти», — дея таъкидлади у.
Йиғилишда туризмни тиклаш масалаларига ҳам алоҳида эътибор қаратилди. 1 июндан бошлаб Ўзбекистонда ички туризмни фаолияти қайта тикланди. Шу билан бирга, президент ташқи туризмни ҳам ривожлантириш кераклигини айтди.
«Қаерда бизни қабул қилишга тайёр бўлса, биз ҳам тайёр бўламиз. Биз дарров самолётларимизни учирамиз. Мана, Туркия билан гаплашаяпмиз, улар ташқи туризмни очганидан, биз ҳам очамиз», — дея таъкидлади президент.
Олдинроқ, бош вазир ўринбосари — Туризмни ривожлантириш давлат қўмитаси раиси Азиз Абдуҳакимов «Газета.uz»га «қизил», «сариқ» ва «яшил» ҳалқаро авиарейсларни ташкил этиш режалаштирилаётганини, ҳамда «Ўзбекистон. Кафолатланган хавфсиз саёҳат» лойиҳаси ҳақида айтиб берган эди.
Шавкат Мирзиёев карантин чораларини юмшатиш ва уларга риоя қилишни кучайтириш бўйича ҳам топшириқлар берди.
«Бу шароитда ишлашга, яшашга ўрганишимиз керак. Бошқа йўлимиз йўқ. Иш услубимиз шундай бўлиши керак: 50 фоиз карантин, 50 фоиз иқтисодиёт», — деди президент.
