АҚШда бир ҳафтадирки ирқчилик ва полициянинг ўзбошимчалигига қарши оммавий намойишлар давом этмоқда. Намойишлар афроамерикалик Жорж Флойднинг оқ танли полициячи қўлида ўлим топганидан сўнг бошланган эди.
Полиция 25 май куни Миннеаполисда (Миннесота штати) дўконда 20 долларлик сохта чекдан фойдаланганлик гумон қилиб Жорж Флойдни қўлга олган эди. Ушлаш вақтида полициячилардан бири — Дерек Шовен — Флойдни ерга ётқизиб, тиззаси билан томоғидан 8 дақиқа давомида босиб турган. Қуролсиз эркак офицерга нафас ололмаётганини айтиб, қўйиб юборишини илтимос қилади. Сўнгра ҳушидан кетади. Суд-тиббий экспертиза натижалари Флойднинг қотиллик натижасида ўлганини кўрсатди.
Жорж Флойд ўлганидан бир кун ўтиб Миннеаполисда норозилик акциялари бошланди. Минглаб одамлар «Нафас ололмаяпман» ва «Қора танлилар ҳаёти аҳамиятга эга» шиорларини кўтариб кўчаларга чиқди. Флойдни қўлга олишда иштирок этган тўрт нафар полициячи ишдан бўшатилди. Офицер Шовенга эса кейинроқ қотиллик айблови эълон қилинди.
27 майдан намойишлар бутун мамлакат бўйлаб ёйилди. Айрим акциялар полиция билан тўқнашувлар ва оммавий тартибсизликлар, талон-торожларга (мародерлик) айланиб кетди. 29 май куни намойишчилар Вашингтонда Оқ уй қаршисида тўпланди. Махсус хизматлар президент Дональд Трамп ва унинг оиласини қисқа муддага ер ости бункерига яширди.
Сўнгги маълумотларга кўра, энг камида 40 та шаҳар, жумладан Нью-Йоркда комендантлик соати жорий этилди. Энг камида 23 та штатда Миллий гвардиянинг 17 мингдан зиёд аскарлари фаолият олиб бормоқда.
Полиция намойишчиларни кўздан ёш оқизувчи ва қалампирли газ, резина ва бўёқли ўқлар билан тарқатмоқда. Минглаб намойишчилар қўлга олинди, ҳалок бўлганлар бор.
2 июнга келиб Жорж Флойд ўлимига қарши Американинг Black Lives Matter ҳаракатини қўллаб-қувватлаб Лондон, Париж, Амстердам, Берлин ва Рио-де-Жанейрода ҳам намойишлар бўлиб ўтди.
